Үздік өнертапқыштар марапатталды

Шымкент теміржолында үздік өнертапқыштар марапатталды. Осы салада табанды еңбек етіп қана қоймай, жаңашыл ойларымен өндірісті дамытуға үлес қосып жүрген теміржолшылар ерекше құрметке бөленді.

Салтанатты жиынды Ләззат Жаримбетова жетекшілік ететін Шымкент магистральдық желі бөлімшесі Ғылыми-техникалық ақпараттық бөлімі ұйымдастырды. Үздік өнертапқыштарды құттықтаған Шымкент магистральдық желі бөлімшесінің директоры Алғазын Қойлыбаев пен «Қазкөліккәсіп» ҚБ Шымкент филиалының төрайымы Нағима Салықбаева құттықтап, оларға тың творчестволық табыс тіледі.  

– Темір жол – ел экономикасының күретамыры. Ал осы күретамырды үздіксіз, қауіпсіз әрі сапалы қызметпен қамтамасыз ету – үлкен жауапкершілік. Бұл жолда тек еңбекқорлық қана емес, жаңашылдық, ізденіс қажет, оны үздіксіз дамыту қажет. Бүгін біз өз еңбегімен тың идеялары арқылы толағай табыстарға қол жеткізген теміржолшы рационализаторларды атап, оларға деген құрметіміз бен алғысымызды білдірмекпіз, – деді бөлімше директоры.  

Шымкент теміржолы бойынша өткен 2024 жыл рацұсыныстар беруде табысты жыл болған. Жоспарда 21 рационализаторлық ұсыныс берілу керек болса, нақты жағдайда 25 ұсыныс берілген. Соның ішінде Шымкент ЖТ бөлімшесі тарапынан жоспарда 6 ұсыныс болса, нақты 7 ұсыныс болды. Ал Магистральдық желі бөлімшесінен 18 ұсыныс бойынша жоба жүзеге асырылды. Олар Шымкент теміржолындағы ШЧ, ЭЧ, ПЧ, ВЧД, ТЧ және вокзал шаруашылығы қызметкерлері арасынан шығып отыр. Бұл ұсыныстарды 16 теміржолшы өзінің ізденісі мен тәжірибе-білімінің арқасында ойлап тапқан.  

Айта кетерлігі, Шымкент магистральдық желі бөлімшесі директорының бірінші орынбасары Жомарт Мырзабеков жоспардың орындалуына үлкен үлес қосты. Ол бір өзі 3 рационализаторлық ұсыныс берген. Сонымен қатар Шымкент ЖТ бөлімшесі Қауіпсіздік қызметінің бастығы Ордабай Төлбасының ұсынысы тиімділігімен және маңыздылығымен ерекшеленді, ол «223 тоққабылдаушы» тумблеріне арналған сақтандырғыш қаптама» деп аталатын жобаның авторы ретінде көзге түсті.  

Жиында Шымкент темір жолының абыройын қорғаған 16 өнертапқыштың аты аталып, талантты теміржолшылар Құрмет грамоталарымен марапатталып, бағалы сыйлықтарға ие болды.