Үздіктер анықталды
"Қазақстан теміржолшысы" газетінің Жамбыл облысындағы меншікті тілшісі
Шу локомотив пайдалану депосында машинистер мен көмекші машинистер арасында «Мамандығы бойынша үздік» конкурсы өтті.
Депо бастығының пайдалану жөніндегі орынбасары Мейірхан Орысбай мұндай жоба мамандардың кәсіби деңгейін шыңдауға мүмкіндік беретінін атап өтіп, қатысушыларға сәттілік тіледі. Оқыту жөніндегі нұсқаушы Олег Ермилов төрт кезеңнен тұратын жарыстың талаптарын түсіндірді.
Алғашқы тестілеу кезеңінде қатысушылар локомотив құрылғысы, техникалық эксплуатациялық ережесі, сигнализация бойынша және пойыздар қозғалысы мен маневрлік жұмыстар жөніндегі нұсқаулықтар бойынша теориялық білімдерін көрсетті. Екінші кезеңде үміткерлер фотосуреттер бойынша локомотив жабдықтарының қалай орналасатынын, қандай мақсатта қолданылатынын нақтылайтын викториналық сұрақтарға жауап берді.
– Үшінші кезеңде қатысушылар локомотивтегі практикалық дағдыларын көрсетті. Айталық, шартты түрдегі ақаулар кезінде стандартты емес жағдайларда жедел әрекет етуі керек болды. Байқауға қатысқан 9 машинистің ішінен суперфиналға үш кезеңде 65 балл жинаған Айбек Тұрғыналы, 65 ұпаймен Эдуард Вишерский, ұпай саны 53-ке жеткен Ұлан Әбдіқадыров шықты. Машинистердің көмекшілері М.Әбдірәлі, К.Филипов, О.Саке, С.Тұрсынов, Д.Шынтен арасындағы бәсеке де аса тартысты болды, – дейді нұсқаушы Олег Ермилов.
Байқау қорытындысы бойынша локомотвті бөлшектеу және құрастыру кезінде ең жақсы нәтиже көрсеткен машинист Айбек Тұрғыналы жеңімпаз деп танылса, үздік машинист көмекшісі Диас Шынтен атанды. Жеңімпаздар мен жүлдегерлер арнайы дипломдармен марапатталды.