Теміржол тарланына тағзым

Теміржол көлігі қызметкерлері күніне орай «ҚТЖ» ҰК» АҚ Бас есептеу орталығы филиалында Орталық ардагерлер кеңесінің төрағасы Болатбек Дүйсемалиевтің құрметіне ақпараттық-танымдық іс-шара өтті. Оған Құрметті теміржолшымен қатар Қанат Әлмағамбетов, Қайрат Рсымбетов, Гүлнара Таласпаева сынды танымал теміржолшылар қатысты.

– Ел Үкіметінің Мемлекеттік тілді насихаттау туралы қаулысын орындау аясында «Бас есептеу орталығы» филиалында жергілікті және өңірдегі қызметкерлермен ай сайын онлайн және осындай офлайн кездесулер өткізіп тұрамыз. Бұл жолы алғаш рет ұйымдастырылып отырған ақпараттық-танымдық іс-шара еңбек жолын қарапайым станция кезекшісінен бастап, теміржолдың әртүрлі қызметтік сатыларынан өтіп, қай жұмысты да абыроймен атқарған Болатбек Бекеуұлы Дүйсемалиевтің өмір жолына, еңбек жолына арналды. Оның үстіне, биыл Қазақ темір жолы құрамында Целиноград станциясындағы Тораптық есептеу орталығының құрылғанына 50 жыл толып отыр. Ал Құрметті теміржолшы Болатбек Бекеуұлы Бас есептеу орталығы үшін маңызды кезең, яғни Тәуелсіздік алғаннан кейінгі 1991-1993 жылдары Алматыдағы Информ-есептеу орталығын басқарды. Сондықтан біз орталықтың мерейтойында ел егемендік алып, есін жинап үлгермеген қиын сәттерде орталық жұмысының қисынын келтіріп, тетігін тауып жүргізген білікті басшымен кездесу өткізіп, оның еңбек жолынан сыр шертуді, көпшілікке үлгі-өнеге етуді жөн көрдік, – деп ой бөлісті Бас есептеу орталығының (БЕО) менеджері Қаламқас Алпысбаева.  

Болатбек Дүйсемалиев темір жолда тер төккен жылдарында түрлі қызметтің тізгінін ұстады. Қызылордада станция кезекшісі болып бастаған еңбек жолы пойыз диспетчері, оперативті-басқару бөлімі бастығы, Целиноград станциясының бастығы, Алматы теміржол басқармасында бас инженер, Шымкент жол бөлімшесінде бас инженер, Информ-есептеу орталығының бастығы, «Желдорэкспедиция» бас инженері, Тасымалдарды басқару орталығының директоры, Тасымалдау процесін үйлестіру департаментінің директоры... тағысын тағы қызметтерге ұласты. Сексеннің сеңгіріне бет алған теміржол майталманы 2014 жылдан бері Орталық Ардагерлер кеңесіне төрағалық етіп келеді.  

Дүйсемалиевтің еңбек жолы туралы онымен үзеңгілес болған немесе тәлім-тәрбиесін көрген әріптестері естеліктерімен бөлісіп, жүрекжарды лебіздерін білдірді. Бұл кездесудің ерекшелігі, қатысушылар теміржолшылардың видео арқылы қойған сұрақтарына жауап беріп, дұрыс жауабын тапқандарға БЕО брендінің пледтері, ал әуен арқылы жасырылған әнді тапқандарға кітапшалар тарту етілді.  

Болатбек Дүйсемалиев осындай ақпараттық-танымдық іс-шараны ұйымдастырған Бас есептеу орталығының басшылығы мен ұжымына, ізін басқан теміржолшы іні-қарындастарына ризашылығын білдірді. Өз кезегінде Орталық ұжымы Болатбек Бекеуұлына қазақы нақыштағы картина тарту етіп, естелік суретке түсті.