Шудың Шолпаны бар: ерлермен теңдей атқарады
Теміржолдың мазасыз да тынымсыз жұмысын ерлермен теңдей атқарып, онымен қоса от басы, ошақ қасының да жұмысын дөңгелетіп жүрген нәзік жандар аз емес. Шу қаласындағы темір жол вокзалының басшысы Арысбаева Шолпан Айдарқызы – солардың бірі.
Жолаушылар мен жүк тасымалының басым бөлігін қамтамасыз етіп отырған темір жол саласының қызметі оңай емес. Жолаушыларға сапалы әрі қауіпсіз қызмет көрсету де теміржолшылар алдында тұрған басты міндеттің бірі. Шолпан Арысбаева басқаратын Шу вокзалы – нағыз теміржолдың торабы. Күндіз де, түнде де ерсілі-қарсылы зулап жататын жолаушы құрамдарында есеп жоқ. Олардың бәрі де Шу вокзалынан ең кемі жарты сағат аялдап, жолаушы біткен перрондағы қысы-жазы қайнап жататын көкөніс саудасына лап қояды.
Қарамағындағы 30-ға жуық қызметкері бар Шолпан басқаратын вокзал ұжымы келіпкеткен жолаушы халықтан бөлек, осы 35 жұп жолаушы пойыздарындағы транзит жолаушыларға да қызмет көрсетеді. Қыс айларында мұндағы вокзал қызметін тәулігіне 500-ден аса жолаушы пайдаланатын болса, жаз айларында адам
саны 1500-ден 2000-ға дейін жетеді екен. Вокзалдың қарбалас тірлігін жүйелі жолға қойып, іште де, сыртта да тазалық пен тәртіп орнатып, қонақжай пейілмен қызмет көрсетуді қамтамасыз ету – Шолпанның негізінен әйелдерден құралған ұжымының басты міндеті. Және бұл міндетті олар абыроймен атқарып отыр деуге болады. Адам болған соң әртүрлі, өткен-кеткен жолаушыдан шағым айтылмай тұрмайды, әрине, бірақ вокзал бастығы тәуліктің кез келген уақытында су мен жарық болып, анықтама беретін, билет сататын, ақша беретін электрондық құрылғылар қызметінің мінсіз болуын талап етеді. «Жолаушының қажетін өтеу міндетіміз екені рас және ең үлкен сауапты іс екенін ұмытпаңдар» деп айтып отырады әріптестеріне.
Бүгінде жасы 50-ге таяп қалған Шолпан өмірінің 31 жылын темір жол саласына арнапты. Алғашқы еңбек жолы ел тарихындағы қиынқыстау кезеңмен тұспа-тұс келген екен. Алматы қаласындағы темір жол колледжін, мұнан кейін Орта Азия университетін экономика факультеті бойынша тәмамдаған ол кейіннен М.Тынышпаев атындағы Қазақ көлік коммуникациялар академиясында «Тасымалдау мен жүк қозғалысын ұйымдастыру және көлікті пайдалану» мамандығы бойынша да білім алған. Басшылық қызметке дейін вагон операторы болып еңбек етіп, 1988 жылдан бастап темір жолдың әр саласында еңбек етіп келеді. 2011 жылы Шу темір жол вокзалының бастығы болып тағайындалып, бүгінгі күнге дейін сол қызметті абыроймен атқаруда.
Жалпы, Шу – ежелден теміржолшылар қоныстанған ірі тораптық станция болса да осындағы 1015 теміржол мекемелерін бірде-бір әйел басқармапты. Шолпан – Шу ауданының темір жол саласында басшылық қызметке тағайындалған тұңғыш әйел екен. Бұл да өз кезегінде Шолпанның қайсарлығы мен алғырлығын білдірсе керек және оған жүктелген үлкен сенім. Ал Шу халқы үшін вокзал бастығының орны бөлек. Жұмыс керек болса да, билет керек болса да, орын керек болса да Шолпанды іздеп келеді. Және ол солардың бәріне көмектескісі келеді. «Шешілмейтін түйін жоқ, ең болмаса тырысып көрейік» дейді кейде. Сондықтан үлкен-кішіден «Шолпанға барсаңшы, Шолпанымыз бар ғой, билет табылар» деп жатқанын талай естідік.
Ал от басы, ошақ қасы жайлы сөз етсек, Шолпан Айдарқызы – үш бірдей ұлды тәрбиелеп отырған аяулы ана. Ортаншы ұлы өзінің ізін жалғап, темір жол саласында қызмет етіп келеді.