Бейнет түбі - зейнет

Атырау теміржолына еңбегі сіңген азаматтар аз емес. Солардың қатарына күні кеше өлке теміржолшылары құрметтеп зейнет демалысына шығарып салған Ақжайық пен Атырау белгі беру және байланыс дистанцияларының басшылары Мақсот Тарғынов пен Қабидолла Айтимовты айтуға болады.

Атырау жүк тасымалы бөлімшесі басшысы Мағауия Оразқұлов пен Магистральдық желі бөлімшесі директоры Елубай Сапаров екі азаматқа көпшілік алдында құрмет көрсетіп, ұзақ жылғы елеулі еңбектің зейнетін көру жасына жетуімен құттықтады. Екеуі де қырық жылға жуық өңір теміржолының байланыс саласына айтарлықтай еңбек сіңірген, «Құрметті теміржолшы» белгісіне ие болған абыройлы азаматтар.

Мақсот Жұмағалиұлы еңбек жолын 1974 жылы Гурьев сигнализация және байланыс дистанциясында электромонтер болып бастаған. Әскерден келген соң Алматыда электромеханик мамандығына оқып, Ақтөбе теміржол техникумын бітіріп, содан аға электр механигі, «Ақжайық БББ» ЛЭП орынбасары, соңғы он екі жыл осы дистанцияның басшысы қызметін атқарды. Атырау-Сағыз телімін қамтитын және өз учаскесінде 19 станция, 22 өткел және 5 диспетчерлік айналымға қызмет көрсететін Ақжайық сигнализация және байланыс дистанциясының жұмысы дұрыс жолға қойылғанын біле беріңіз, соңғы 26 жыл бойына ақаусыз жұмыс істеген.

Өңірде соңғы жылдары «Тальго» жүрдек пойызының жүруіне орай, Мақат станциясының екі жағынан, Жамансор, Мұқыр, Жантерек, Ескене және Теңдік станцияларында қорғалатын, күзетілетін, автошлагбаумы бар 7 өткел салынды. Бүгінде дистанция барлығы 22 өткел жұмысын қадағалап отыр. Байланыс саласындағы тың өзгерістерді Мақсот аға тез игеріп, өндіріске батыл енгізіп отыруымен де өзгелерге үлгі болды. Соның арқасында 33 жасында «Құрметті теміржолшы» атағына ие болды.

Қабидолла Табылдыұлы да Гурьев теміржол техникумын техник-электрик мамандығына бітірген соң еңбек жолын Гурьев байланыс дистанциясында электр монтері болып бастаған. Аға электромеханик, Атырау-Нарын учаскесінің бастығы, Гурьев бөлімшесінің қозғалыс қауіпсіздігін бақылау ревизоры, 1993 жылдан Атырау сигнализация және байланыс дистанциясының директоры болып еңбек етті. Атырау-Ганюшкино телімін қамтитын Атырау сигнализация және байланыс дистанциясы өз учаскесінде 15 станция, 10 өткел және 5 диспетчерлік айналымға қызмет көрсетеді. Дистанцияда ең алдымен, бағдаршамдар дұрыс жұмыс жасауы тиіс. Соған орай, Махамбет станциясында, 4, 15 бекетте бағдаршамдар жаңартылды. Сол секілді Ганюшкино, Махамбет, Исатай, Аққыстау, Тумманное, Д.Нұрпейсова, т.б. станция-разъездерде релелік шкафтар, ТШ-2000 релелері ТШ-65-ке, жерүсті кабельдері жерастына, КТСМ қондырғылары жаңасына алмастырылып, белгі беру мен байланысты жақсарту мақсатында көптеген жұмыстар жүргізілген. Соңғы технологияларға сай бұрынғы ПОНАБ қондырғысы жетілдірілген КТСМ-02 қондырғысымен жаңартылды. МаңғыстауБейнеу-Оазис-Мақат-Атырау-Ақсарай учаскелерінде ұзындығы 1196 шақырымды құрайтын диспетчерлік орталықтандыру қондырғысы түбегейлі жаңартылды. Мұнда да байланыс бұрынғыдан әлдеқайда жақсарып, еңбек үдерісінің үдеуіне жағымды ықпал етуде. Бұл дистанция да ұзақ жылдар ақаусыз жұмыс істеген. Алматы теміржолшылар институтының түлегі Қабидолла Айтимов та «Құрметті теміржолшы» атанған.

Бір салада қырық жылдың үстінде үздіксіз еңбек еткен қос теміржолшыға әріптестері ұзақ жылғы бейнеттің зейнетін көруді, сол үшін мықты денсаулық тіледі.