Жол күтімінде инженерлердің де үлесі зор
Абай облысы бойынша меншікті тілші
Түрксібтің төл туындысы саналатын Шар станциясының тумасы Бақытжан Шинжина Жаңа-Семей жол дистанциясының есігін имене аттағаны кеше ғана сияқты еді. Содан бері, міне, 25 жылға жуық уақыт зымырап өте шығыпты... Алғашқыда техникалық бөлімде техник болды. Жоғары білім алған соң қызметі де, оған сай жүктелетін жауапкершілігі де артты. Бүгінде ПЧ-40 жетекші инженері болып абыройлы қызмет атқаруда. Тек бір ұжымда ғана табан аудармастан еңбек етіп келеді. Жолдың ағымдық күтімін жүргізу, көктем мен күзде комиссиялық тексерулер өткізу – өзіндік қиындығы бар күрделі жұмыс. Дистанцияға келіп түсетін, ауыстырылатын рельстер мен шпалдар, жол машиналарының жұмысы, т.б. жайлы есеп-қисаптың барлығы тікелей Бақытжан Слямғазықызының алдынан өтеді. Бұл ретте құжаттамалық іс-қағаздардың барлығы, жазғы жол жөндеу жұмыстары мен қысқы қар сенбілігіне қатысты нақты шешім қабылдауда басшылық тарап Бақытжан Слямғазықызының да пікір-ұсынысын ескеретінін айта кету ләзім. Ондайда ұзақ жылғы тәжірибе мен нағыз кәсіби маман иесіне тән түйсік кейіпкерімізге көмекке келеді екен.
– Бақытжан Слямғазықызының орны бөлек. Жұмыстағы жеделдік, қабілет, позитивті көңіл күй қашан да абырой әпереді емес пе!? Бұл ретте әріптесіміз озық оймен, мол тәжірибесімен де дараланады. Өзі еңбек ететін бөлімнің жұмыстарына қатысты бағыт-бағдар әзірлеуде, жаңа жобалар мен жоспарлар құруда тиянақты да тыңғылықты еңбегімен сенімнен шығады. Оның сыртында техникалық құжаттамаларды әзірлеуде өте сауатты маман, жауапкершілік – оның ең басты қасиеті, – дейді бұл орайда ПЧ-40 мекемесінің техникалық бөлім бастығы Ғафур Рахымбаев.
Басшылық Бақытжан Слямғазықызының зор жауапкершілігі мен кәсібилігін аса жоғары бағалайды екен. Кейіпкерімізбен жарты сағаттық сұхбат барысында оның дистанциядағы 286 адамның функционалдық қызметі мен 239 шақырымдық бас жолдың техникалық сипатын, желі бойындағы дистанцияға қарасты 20 станциядағы жолшылар қосындарының ахуалын мүдірмей айтатын есте сақтау қабілетіне таң қалдық. Мұнымен қоса, өткен жылдар мен ағымдағы жылдағы жол күтіміндегі ерекшеліктер, дистанция паспорты бойынша фактіге қанықтық. Жаңа-Семей мен Жарма аралығындағы бір бағытты желі бойын ат ізін суытпай жиі шарлайтын жетекші инженердің назарынан еш нәрсе таса қалмайды екен. «Жауырды жаба тоқитын» кейбір жол шеберлері мен бригадирлер де Бақытжаннан ештеңе жасыра алмайды екен. Кешегі Дәулет Садықов, бүгінгі Жамбыл Бұланбаев, Мұрат Мамырбаев сынды жол тарландарымен бірлесе еңбек етіп, солардың тәлімін көрген, нағыз теміржолшыға тән қасиеттері бар Бақытжан Шинжина биылғы кәсіби мерекеге орай «Үздік маман» төсбелгісімен марапатталды.