Даңқты теміржолшы тұрған үйге ескерткіш тақта ілінді

Қызылорда қаласының солтүстік бөлігіндегі «Шанхай» тұрғын ауданында даңқты теміржолшы Ізбас Байбосынов тұрған үйге ескерткіш тақта ілінді. Салтанатты шараға қатысқан теміржолшылар мен ардагерлер ел басына күн туған қиын-қыстау жылдары жанқиярлықпен еңбек еткен Ленин орденді жерлестері туралы естеліктерімен бөлісті. 1901 жылдың наурыз айында Бірқазан станциясында шаруа отбасында дүниеге келген Ізбас Әбдіраманұлы осы ауылда бес кластық білім алып, станциядағы жол жөндеу мекемесіне 1918 жылы жұмысшы болып қабылданған екен. Ақтар мен қызылдар алма-кезек алмасып келіп-кетіп жатқан азамат соғысы жылдары да табан аудармай 12 жыл еңбек етеді. 1930 жылы Қызылорда паровоз депосына слесарь болып ауысыпты. Бірнеше жылдан соң қабілетті жігітті басшылық Ташкентке оқуға жіберіп, кондукторлар даярлайтын екі жылдық курсты бітіреді. 1934 жылы өз мамандығы бойынша бас кондуктор қызметіне ауыстырылады. Қыстың қақаған суығына, жаздың аптап ыстығында жүк пойыздарына ілесіп жүріп, түнде май шаммен, күндіз жалауша көтеріп кондуктор болу өте ауыр, қиын жұмыс еді. Ізбас атамыз ҰОС кезінде де броньмен майданнан қалдырылып, жұмысын жалғастыра береді. Кеудесі орден-медальға толған теміржолшы 40 жылдан аса еңбек етіпті.

– Ізбас ақсақалдың аймақ теміржолының жұмысына қосқан үлесі ерекше, кондуктор болу деген ол кезде жігіттің жігіті шыдайтын, екінің бірі төтеп бере алмайтын ауыр жұмыс болған. Ол кезде жоғары марапат алу қарапайым теміржолшы үшін сирек ұшырасатын жағдай болған, ал бұл кісі өз заманының барлық марапатын иеленген, – деп естелік айтты тақтаның ашылу салтанатында теміржолшы ардагерлер кеңесінің төрағасы Сисенбі Шермаханов.

Қызылорданың мақтанышы болған даңқты теміржолшы Ізбас ақсақалдың ізбасарлары бүгінде ата жолын жалғап, өнегелі ісін әрі қарай жалғастыруда.