Ақжайық станциясында өртке қарсы оқу-жаттығу өтті
Атырау облысы бойынша меншікті тілші
Ақжайық станциясында таңертеңгі сағат 10.00-де мұнай тиелген вагон отқа оранғаны туралы хабар жетті. Оны алдымен байқаған станцияның вагон құрастырушысы бөлімше кезекшісіне хабарлаған.
Осы сценарий бойынша өрбіген кезекті оқу-жаттығуда Ақжайық өрт сөндіру пойызы тік көтеріліп, санаулы минутта оқиға орнына жетіп, өртті сөндіруге кірісті. Көп кешікпей апаттық жағдайдан құтқару қызметі және қалалық өрт сөндіру қызметі де келіп жетіп, өршіген өртті көбікпен сөндіруге жұмылдырылды.
Атырау жүк тасымалы бөлімшесінің азаматтық қорғаныс және төтенше жағдайлар жөніндегі инженері Нұрлан Сұлтанғалиевтің айтуынша, бұл – жылына екі рет болатын жоспарлы өрт сөндіру оқу-жаттығуы.
– «Темір жол көлігімен қауіпті жүктерді тасымалдау кезінде төтенше жағдайлар зардабын жою» тақырыбында шартты түрде өткен бүгінгі оқу-жаттығуға қалалық деңгейдегі өртке қарсы қызмет және ең алдымен өзіміздің темір жолдың өрт сөндіру пойызы, әскерилендірілген күзет, бөлімшенің санитарлық посты, қалпына келтіру пойызы, электрмен қамту, жол, байланыс дистанциялары қатысты. Барлығы 70-ке жуық адам және 9 техника осы шараға жұмылдырылып отыр. Бұл – жеке құрам мен өртке қатысы бар құрылымдық мекемелердің төтенше жағдайға дайындығын тексеру әрі шыңдау, апатты жағдайда шұғыл шешім қабылдауға үйрену үшін қажетті шара, – дейді ол.
Өрт шыққандығы туралы хабар жетісімен Атырау электрмен жабдықтау дистанциясының электромонтерлері вагон үстінен өтіп тұрған жоғары кернеулі электр желісін өшірген. Бұл да қауіпсіздік үшін маңызды шарт. Сөйтіп, тілсіз жаумен күрес әп-сәтте-ақ басталып, жедел түрде сөндірілді. Ақжайық өрт сөндіру пойызының командасы «өртке оранған» вагонды сумен салқындатып тұрды, өйткені мұнай өнімдері тез тұтанғыш әрі сөнуі қиын. Сол себепті көбікті көлік жеткенше осылай амалдай тұрып, содан кейін вагон қалың көбікпен жабылып, өрт сөндірілді. «Біз осы шараға орай станцияның жүк тиейтін бөлігіндегі екінші жолды бөліп, оқу-жаттығудың ойдағыдай өтуіне барлық жағдай жасадық» дейді станция бастығы Есенжан Темірғалиев.