Рейд: Бейнеу станциясында 20 әкімшілік заңбұзушылық тіркелді

Жыл басынан бері Бейнеу станциясындағы теміржол төңірегінде 20 әкімшілік заңбұзушылық тіркелген. Фактілер станциядағы желілік полиция бөлімшесі өткізген рейдтер барысында анықталған.

Жуырда тәртіп сақшылары теміржолға жақын маңдағы тұрғындармен және вокзал айналасындағы азық-түлік сататын кәсіпкерлермен кездесу өткізді. Жиында жоғарыдағы құқықбұзушылық оқиғаларға тоқталған полиция өкілдері олардың дені көпшілік ортада ішімдік ішу, теміржолды рұқсат етілмеген жерден кесіп өту, белгіленбеген жерлерде сауда жасау сияқты заң бұзушылықтар құрайтынына ерекше мән берді. Сондай-ақ балалардың қауіпсіздігі, пойызға мал басылуы жайттарының жиілеуі де өткір сөз болды. Тұрғындарды қауіпсіздікті сақтау бағытында бірлесе әрекет етуге шақырды.  

Теміржолшылар тарапынан Бейнеу станциясы бастығының орынбасары Данияр Нурмолдин мен Бейнеу теміржол вокзалының бастығы Айсара Тұрғанбаева сөз алып, өз ойларын ортаға салды. Ал жергілікті санитарлық-эпидемиологиялық бақылау бөлімшесінің бастығы Нұрболат Сарбупиевтің сөзі заңсыз сауда жасаушыларға арналды, маман белгіленген орны не құжаты жоқ күмәнді тұлғалардан тамақ сатып алудың соңы неге соқтыратынын түрлі мысалдармен ескертті. Белгілі болғандай, Бейнеудегі теміржол перронында 26 сауда нүктесі тіркеліп, заңды қызмет көрсетеді екен.

– Іс-шараның көздеген мақсаты – қоғамға қауіпсіз жүріс-тұрыс ережелерін ескерту. Осы мақсатта ескертпелік буклеттер таратып, профилактикалық жұмыстар жүргізудеміз, – дейді Бейнеу станциясындағы Желілік полиция бөлімшесінің бастығы Насыр Дербисалиев.