2022 жылы теміржол өткелдерінде 26 жол-көлік оқиғасы тіркелген
Маңғыстау облысы бойынша меншікті тілші
Өткен жылы еліміз бойынша теміржол өткелдерінде тіркелген деректерге назар аударсақ жан түршігеді. Өткелдерде болған жол-көлік оқиғалары қаншама адамды ажал құштырып, қанша отбасын қара жамылдырған...
Мұның бәрі жол-көлік ережесінің бұзылуы салдарынан туындайтыны айтпаса да түсінікті. Оған әсер ететін факторлар да әрқалай. Автокөлік жүргізушісінің ескертпелерді елемеуі мен ескермеуі, асығыстық танытуы, сирек жағдайда көлік тежегішінің істен шығып немесе жүргізуші еркіне бағынбай қалуы сынды себептер. Маңғыстау жол полициясының қызметкерлері Маңғыстау жол дистанциясының мамандарымен бірлесіп Жаңаөзен, Мұнайлы және Қарақия аудандарында рейдтік шаралар жүргізуде. Олар осындай фактілер орын алса, мысалы, автокөлік теміржол өткелінің үстінде тұрып қалса немесе теміржолда қажетті ескерту белгілері болмаған жағдайда автокөлік жүргізушілері қалай әрекет ету қажеттігін түсіндіріп, арнайы үнпарақтар таратып, көпшілік орындарда профилактикалық кездесулер өткізуде.
– Былтырғы жылды ешқандай жол-көлік оқиғасынсыз аяқтадық. Десек те, Қазақстан темір жолы бойынша болған жағдайлар алаңдатпай қоймайды. 2022 жылы теміржол өткелдерінде 26 жол-көлік оқиғасы орын алыпты. Оның бесеуі күзетпелі, он бесі күзетпесіз, тағы бесеуі реттелмейтін өтпелерде болса, біреуі белгіленбеген жерде тіркелген. Сол аталған өткелдердегі жол-көлік апатының нәтижесінде 13 адам зардап шегіп, 16 адам қаза тапқан. Бір ғана автокөлік жүргізушісінің кесірінен көліктегі өзге жолаушылар да мерт болған деректер кездеседі. Сондықтан біз Жол полициясымен бірге профилактикалық жұмыстарды күшейтіп жатырмыз. Былтыр да алты рет рейд өткізіп, 1374 жүргізушіні ережелермен таныстырдық. Автобазаларға арнайы барып кездесулер ұйымдастырдық. Осы жылға да бірқатар жоспарымыз бар, – дейді Маңғыстау жол дистанциясының жетекші инженері Мұхтар Кульчанбаев.