Қауіпсіздік акциясы тұрақты өткізіліп келеді
Маңғыстау облысы бойынша меншікті тілші
Ақпан айының 20-24 күндері аралығында Бейнеу станциясында «Көліктегі қауіпсіздік» акциясы ұйымдастырылды. Желілік полиция бөлімшесі вокзалдағы жолаушылармен профилактикалық жұмыс жүргізіп, мектеп оқушыларымен кездесу өткізді.
Алдымен көліктегі полиция қызметкерлері жергілікті теміржолшылармен бірге мектептерді аралап, 4-8 сынып оқушыларына «Темір жол – аса қауіпті аймақ!» тақырыбында дәріс оқыды. Мектеп балаларын теміржол аумағындағы қауіп-қатерден сақтандыру бағытында өткен сабақта Бейнеу жол дистанциясының мамандары Г.Далабаева мен П.Нұрымбет өз саласы бойынша қауіп-қатерді түсіндірсе, полиция қызметкерлері С.Жақыпов пен Т.Қарымсақов оның құқықтық себеп-салдарын баяндап берді. Аталған шараға Әскерилендірілген теміржол күзетінің қызметкерлері де тартылып, олармен бірлесе теміржолды кез келген жерден кесіп өтетіндермен түсінік жұмыстары жүргізіліп, «Көліктегі қауіпсіздік» тақырыбында үнпарақтар таратылды.
Полиция қызметкерлерінің сөзіне сүйенсек, жалпы мұндай қауіпсіздік шаралары тұрақты жүреді. Бейнеу станциясындағы желілік полиция бөлімшесінде аптаның әр 4-5 күндері «Темір жол – аса қауіпті аймақ!» жедел профилактикалық іс-шарасы өтеді.
– Акция аясында жүргізілген жедел жұмыстар барысында теміржолдың белгіленбеген жерінен өткен 3 адамға ескерту жасалды. Сондай-ақ түнгі мезгілде жалғыз жүрген 5-сынып оқушысы анықталып, ата-анасы жауапқа тартылды, – дейді Бейнеу станциясындағы желілік полиция бөлімшесінің бастығы Насыр Дербисалиев.