Ақтөбедегі пойыз апатының себебі анықталуда
Ақтөбе облысы бойынша меншікті тілші
Жексенбі күні Ақтөбе өңіріне қарасты Бершүгір станциясында маневрлік локомотив «Бішкек-Самара» пойызымен соғысып, оқыс жағдай орын алды.
Халықаралық бағыттағы пойыз вагондары рельстен шығып кетіп, алты сағатқа жуық кідірді. Станцияда пойыз жолаушыларына ыстық тамақ ұйымдастырылып, олар басқа құраммен аттанып кеткенше жағдай жасалды.
«Оқыс оқиға 5 наурыз күні сағат 10:20-да тіркелді. №317 жолаушылар пойызының тепловозы және 1 және 2-вагондарының үш доңғалақты жұбы рельстен шығып кетті. Оқиға орнына Қазавиақұтқару тікұшағы мен қалпына келтіру пойыздары шұғыл жетті», – деп хабарлады өңірдегі төтенше жағдай департаменті.
Рельстен шығып кеткен пойызда 200-ден астам жолаушы болды. Оның ішінде Қырғызстан, РФ және Қазақстан азаматтары бар. Жолаушыларды дәрігерлер қарап шықты, зардап шеккен жоқ. Жергілікті әкімдіктің ұйымдастыруымен ауыл азаматтары теміржол бойына қазан-ошақ қойып, жолаушыларға ыстық тамақ дайындап үлестірді. ТЖД-нің хабарлауынша, Бішкек – Самара бағытындағы пойыз сағат 16:05-те қайта қозғалған.
Апатты оқиға Қандыағаш станциясындағы Желілік полиция бөлімінің сотқа дейінгі тергеп-тексеру бірыңғай реестріне алынды. Іс Қылмыстық Кодекстің 344-бабы 1-бөлігімен қозғалды, яғни теміржол көлігі жүрісі немесе оларды пайдалану қауіпсіздігі қағидаларын бұзу бойынша тіркелді. Апаттың себеп-салдарын арнайы комиссия анықтайтын болады.