Қауіпсіздік: Тұрғындарды ақпараттандыру жұмыстары жалғасып жатыр

Ел шығысында желі бойындағы қауіпсіздікті күшейту жұмыстары жыл басынан бастап мықтап қолға алынуда. Небары екі айдың ішінде бірқатар акциялар мен рейдтік іс-шаралар ұйымдастырылды. Жуырда «Көліктегі қауіпсіздік» атты тағы бір акция өтті.

Мақсат – теміржол бойындағы жасөспірімдер бұзақылығына жол бермеу, балалардың әсіресе түнгі мезгілде бейсауат жүрмеуін қадағалау, сонымен қатар жас буынның желі бойында апатқа түсіп, жарақаттануларын болдырмау болатын.  

Бұл орайда Семей станциясындағы желілік полиция бөлімінің тәртіп сақшылары жергілікті теміржолшылармен бірлесе отырып, желі бойына таяу орналасқан оқу орындарында болды. Кездесулер өткізіп, онда қылмыстық-процессуалдық және әкімшілік кодекс бойынша түсінік беру жұмыстарын жүргізді. Сонымен қатар, үш мектеп және бір колледжде, көптеген еңбек ұжымдарында лекциялар оқылды. Бұл шаралармен қоса, вокзалдарда және жекелеген станциялар тұрғындармен кездесулер өткізіліп, желі бойындағы қауіпсіздік шаралары бойынша мол мағлұматтар берілді.  

Сол тәрізді бес мәрте жолаушылар пойызында жиын ұйымдастырылып, түсінік беру жұмыстары жүргізілді. Желі бойындағы қайғылы жағдайлардың алдын алу тақырыбы аясында теміржол мекемелері қызметкерлерімен дөңгелек үстел басқосулары да ұйымдастырылды.  

Өкінішке орай, мұндай шаралар жиі өткізілгенімен, кемшіліктер қатары азаяр емес. Мәселен, аталмыш акция аясында өткізілген 6 рейдтік шара кезінде 62 құқықбұзушылық фактілері тіркеліпті. Олардың арасында жасөспірімдердің үлесі көп. Олармен профилактикалық жұмыс, ал ата-аналарымен әңгімелесулер өткізілді.  

Бұл бағыттағы жұмыстар алдағы уақыттары да тұрақты түрде жүргізілетін болады. Семей магистральдық желі бөлімшесі басшылығының қолға алуымен желі бойындағы қауіпсіздік шаралары күшейтіліп, бұрын-соңды болмаған деңгейдегі жұмыстар жүргізілуде. Оған қумажолдар бойындағы қараусыз жайылған мал мен теміржолды белгіленбеген жерден кесіп өтетіндердің жолын кесу сынды шаралар кіреді.