Сырдан төнген қауіп қандай?

Осы аптада Сырдария өзенінде құрысқан мұз ерте еріп, өзен суы жылдағы деңгейінен тез көтеріліп, дарияның тасу қаупіне байланысты дабыл қағылуда. Теміржол саласына оның әсері қандай, қауіп-қатер бар ма?

Қызылорда магистральдық желі бөлімшесі жол бөлімінің жетекші инженері Мейіржан Жүнісов Сырдария өзенінің жағдайы тәулік бойы бақылауға алынғанын жеткізді. Айтуынша, еріген қар суы мен көктемгі жауын-шашынның пойыздардың қозғалыс қауіпсіздігіне қауіп төндірмеуі үшін дайындық жұмыстары белгіленген кесте бойынша жүргізіліп жатыр екен.  

– Компания басшылығының №957-ЦЗ бұйрығына сәйкес Қызылорда магистральдық желі бөлімшесі директорының №5 бұйрығы шығарылып, арнайы мамандардан жасақталған комиссия құрылды. Сол комиссияның іс-жоспарына орай жол бойын көктемгі тасқын судың шайып кетуінің алдын алу жұмыстарына дайындық тұрақты жүргізілуде. Аймақта тосын жағдай орын ала қалған жағдайда жұмылдырылатын үш пойыз жасақталған. Теміржол бойындағы қауіпті аймаққа бақылау жасау тәжірибелі теміржолшылардан жасақталған бригадаға жүктелген, олар кезекшілік жасауда, – деді жол бөлімінің жетекші инженері Мейіржан Жүнісов.  

Арнайы құрылған бақылау комиссиясының мүшелері Сырдария өзеніне жанжақтан құйылып жатқан су мөлшерін жіті қадағалап отыр. Мәселен, 9 наурыз күнгі мәлімет бойынша Шардара су қоймасынан секундына 800 м/сек, Көксарайдан 800 м/сек су өткізіліп, Тасбөгеттегі Қызылорда су торабына 778 м/сек су құйылып жатқандығы белгілі болды. Сонымен қатар қауіпті аймақ саналатын Жосалы – Анакөл, Анакөл – Қызылтам және Қызылорда – Қаракеткен учаскелеріндегі жасанды құрылыстар, теміржол асты көпірлері мен су өткізу құбырлары толық тазаланып, дрезиналармен, автотехникамен, байланыс құрылғыларымен жарақталған дистанция жолшылары кезекшілік атқаруда.  

Қазіргі таңда Сырдария өзеніндегі еріген мұзды ағын жылжып Қармақшы ауданының шекарасына жеткен. Жылжыған мұздақты теміржолшылармен қатар ТЖМ облыстық штабының қызметкерлері де бақылап, өзен суы арнасынан асып кетпеуін қадағалап отыр.