Ақауды дыбысынан анықтап, апаттың алдын алды

Қызылорда станциясындағы техникалық қызмет көрсету пунктінің вагон қараушы-жөндеушісі Марат Пұханбаев жүк вагонының бірінші телешкіcінің оң жағындағы екінші жұп доңғалағы буксының М12 типті болтының сынып шашырап кеткен ақауын тауып, қауіптің алдын алған.

Кәсіби тұрғыдан сыралғы қызметтің қыр-сырын 17 жылдан бері жетік меңгерген Марат Бахтиярұлы ақаулы вагонды доңғалақ буксынан шыққан дыбыста қосымша шуыл қоса шығып тұрғанынан анықтапты. Жалпы вагон қараушылар станцияға аялдайтын пойыздарды қауіпсіздік бекетінде күтіп алады. Олар пойыздың келуін жай күтіп тұр десек қатты жаңылысамыз, мамандар бекетке енген вагондардың жүрісін, олардың доңғалағынан шыққан дыбысқа құлақ түріп тыңдап тұрады, доңғалақтың жүрісіне де зер салып, қосымша шыққан оғаш дыбыстың, бөлек шуылдың бар-жоғына да құлақ түріп, күнделікті жүрісінен өзгешелік бар-жоғын бақылап тұрады екен.

– Наурыздың он бірінде ауысыммен жұмысқа түскен Марат Бахтиярұлы вагондарға техникалық қызмет көрсетіп келе жатып №2680 пойыздың сұйық зат тиелген вагон-цистернасының доңғалақ жұбыннан ақауды анықтайды. Қолындағы балғасымен ұрып,  вагонның ақаулы екеніне көз жеткізген Марат рация арқылы тиісті орындарға дереу хабар берген. Хабар бойынша күмәнді вагонды тексергенде ақау бары айқындалып, вагон құрамнан ажыратылды. Бұл әріптесіміздің қырағылығы мен өз кәсібіне деген адалдығын көрсетеді, – дейді Қызылорда станциясындағы техникалық қызмет көрсету пункітінің бастығы Рүстем Ұзақбаев.

Вагондарды осылайша кәсіби тұрғыдан қарау тәсілін құрметті теміржолшы Арғын Орымбаев басқаратын Қазалы вагон пайдалану депосының барлық вагон қараушы-жөндеушілері кәсіби деңгейде меңгерген. Осыған дейін де вагондардың бүйір рамасынан, доңғалақ буксынан талай ақауды осы депоның қырағы көз, саққұлақ вагоншылары анықтап, ақаудың алдын алғаны белгілі. Бұл биылғы жылы Қызылорда станциясында табылған екі ақаудың бірі ғана.

– Жұмыс барысында вагондарға техникалық тексеру жасап келе жатып вагон-цистернасының доңғалағынан шыққан дыбыстың қосарланып тұрғанын аңғардым. Жаңылыс естідім бе деп доңғалақ буксын қайтадан екі-үш рет ұрғылағанымда да қосарлы дыбыс бар екеніне көз жеткіздім. Өзім ақаудың барына толық сенімді болған соң жанымдағы серіктестеріме, станция кезекшісі мен басшылыққа хабар бердім. Вагон доңғалағының мұздай халінде буксын ашқанымызда роликті ось қорабының шеткі бекіткішінің бекітпесіндегі M12 болтының сынып шашырағандығы анықталды. Тиісті шараларды жасау үшін вагон құрамнан ажыратылды. Станцияда ақаулы вагонды тауып құрамнан ажырату біздің вагон қараушылардың кәсіби міндеті, біз міндетімізге адал болуға тырысамыз, –дейді ақауды дыбыстан ажыратып, өзінің қырағылығын ерлікке санамай кәсіби міндетке, адалдыққа балаған Қызылорда станциясындағы техникалық қызмет көрсету пункітінің вагон қараушы-жөндеушісі Марат Пұханбаев.