Маңғыстаулық вагон қараушы осымен үшінші рет ақау тапты

Маңғыстау вагон пайдалану депосының вагон қараушысы Нұркен Қалылаев биыл жүк вагонының бүйір рамасынан қауіпті ақауды анықтап, апаттың алдын алды.

Әдеттегідей түнгі ауысымға жұмысқа келген теміржолшы Ақтау портына жүк апарып тастап, кейін қайтып бара жатқан пойызды қарауға шыққан. Бүкіл вагонның қозғалыс бөлігін ұстап тұрған бүйір рамасына қол шамымен жарық түсіріп қарағанда 160 мм көлемінде сызат бар екенін көреді. Дереу басшылыққа хабарланып, акт толтырылды. Ал вагон пойыздан ағытылып алынып, жөндеуге жіберілді. Жалпы бұл – Нұркен Қалылаевтың 17 жылдық тәжірибесінде үшінші рет тауып тұрған күрделі ақауы.  

– Ақаудың ең қауіптісі осы – бүйір рамасындағы ақаулар. Бір вагонды екі қапталынан екі адам қараймыз. Күндіз не түнде шықсаң да аса қырағылық танытып, ақауы бар вагонды жібермеуге барыңды салуың керек. Себебі бүйір рамасына түскен сызаттан сол вагон құласа, онымен бірге басқа вагондар да жолдан шығып құлайды. Бізге аптаның ішінде сәрсенбі және бейсенбі күндері сабақтар өткізіледі. Соның барысында нұсқаушы-инструктор өзге өңірлер мен елдерде болған апаттар, олардың қандай ақауға байланысты туындағанын бейнероликтер арқылы көрсетіп отырады. Оқу полигонына барып іс жүзінде қолмен ұстатып көрсетіп, біздің әркез білім деңгейімізді толықтырып отыруға жағдай жасалады, – дейді тәжірибелі теміржолшы.  

Мектеп бітіре салысымен вагон шаруашылығында слесарь болып еңбек жолын бастаған кейіпкеріміз, содан бері тапжылмай бір жерде жұмыс істеп, тәжірибе арттырып келеді. Сырттай білімін жетілдіріп, арнайы диплом алды. Өзі Маңғыстау станциясына қарасты Қызылтөбе ауылында тұрады. Отбасында бес баласы өсіп келеді. Футболды жақсы көретін Нұркен ұжым атынан команда жасақталғанда депо намысын қорғайды.