Лаңкестікке жол жоқ

Тараз вокзалында өткен «Найза-Терроризмге қарсы – 2023» бірлескен тактикалық оқу-жаттығуға вокзал шаруашылығы, желілік полиция бөлімі, жеке күзет агенттіктерінің өкілдері қатысты.

– Темір жол – стратегиялық нысан. Сондықтан мұндай шараның басымдығы жоғары. Қылмыстық ниеттегі немесе террорлық әрекетке баратын арам ниетті адамның не ойлағанын білмейсің. Оны дер кезінде танып, жедел шаралар қолданбасаң соңы жақсылыққа апармайды. Сондықтан халық көп шоғырланған вокзал сынды стратегиялық күзетілетін нысандарға террористік топтардың кіруіне жол бермеу үшін жедел іс-шараларын ұйымдастыру салаға жауапты мамандар үшін өте маңызды. Биыл вокзалда екі оқиға тіркелді. Біздің қызметкерлердің біліктілігі арқасында келеңсіздіктің алдын алу мүмкін болды, – дейді Тараз станциясы корпоративтік қауіпсіздік қызметінің терроризмге қарсы қорғаныс бөлімінің бас маманы Данияр Ташметов.  

Өткізілген оқу-жаттығу шараларына жоғары баға берген ҚР ҰҚК Терроризмге қарсы орталығы басшылығы белсенді кәсіби қимылдары мен террористік қатерге жол бермегені үшін Жамбыл магистральдық желі бөлімшесі директорының вокзал шаруашылығы жөніндегі орынбасары Бейбіт Садықбеков, вокзал бастығы Дидар Мүсіретәлиев, инженер Абзал Егембердиев, ЖПБ бастығының орынбасары, полиция подполковнигі Аслан Дүйсембаев, полиция подполковнигі Асқат Кулибаев және «KZ Protection Grop» ЖШС өкілдеріне алғыс білдірді.