Маңғыстаудағы комиссиялық байқау Болашақ станциясынан басталды

Маңғыстаудың күрт құбылмалы континенттік климатына байланысты жыл маусымдары жылдам ауысып, көктем келісімен күн күрт жылынып, жердің тоңы бірден жібиді. Сондықтан мұндағы көктемгі комиссиялық байқау да кейбір өзге өңірлерге қарағанда ертелеу басталады.

Биыл да түбек теміржолшылары жазғы тасымалға дайындық жұмыстарына ерте кірісті. Мекемелер көктемгі комиссиялық байқауды өткізуге дайындық жүргізіп, басшылық іс-шаралар жоспарын жасақтап, комиссия құрамын бекітіп, байқаудың кестесін жасап, тиісті бұйрығын шығарды. Соған сәйкес комиссиялық байқау 20 наурыздан 20 сәуірге дейін өткізу білетін болып белгіленді.  

Жоспар бойынша комиссиялық байқау орталықтан қашықта орналасқан шекаралық станция Болашақтан басталды. 28 наурыз күні Маңғыстау қосалқы бөлімі басшысы Нәжімеден Ғұбашов, Маңғыстау магистральдық желі бөлімшесінің директоры Мұхтар Бақтыгереев, Қозғалыс қауіпсіздігі департаментінің өңірдегі бас ревизоры Болат Дүйсәлиев бастаған комиссия құрамы Түркіменстанмен шекарадағы станцияға жол тартты. Болашақтағы нысандарды аралап, жан-жақты тексерістен өткізуге бір күн уақыт кетті. Тек келесі күні түске жақын Бестөрткүл бекетіне бет алған комиссия осылай кезекпен Құрмаш, Тай, Бопай, Ақбөбек, Бастау, Өзен станциялары мен бекеттерін аралап шықты.  

– Түбек теміржолының аумағы үлкен, инфрақұрылымдар мен нысандар да көп болғандықтан бәрін аралап шығуға, мұқият тексеруге біршама уақыт қажет болды. Байқаудың бірінші кезеңінде Болашақ – Өзен телімін аралаған комиссия мүшелері екінші кезеңде Жетібай, Қарақия, Боржақты, «Р» бекеті, Маңғыстау, Ерсай, Құрық порты бағыттарында жұмыс істеді. Бұл станциялар мен бекеттерде комиссия назарынан теміржол мекемелері, ғимараттардың жай-күйі, инфрақұрылымдар жағдайы, жұмысшылардың әлеуметтік тұрмысы, тағы басқа жағдаяттар тыс қалмады, – дейді Маңғыстау қосалқы бөлімі өндірістік-техникалық бөлімінің инженері Еркін Айдарбаев.  

31 наурызда Маңғыстау станциясына оралған комиссия 3 сәуірден бастап сапарын Бейнеу бағытында қайта жалғастырды. Бір апта Бейнеу телімін тексерген комиссия бүгінде Маңғыстаудың өз басында жұмыстарын жалғастыруда. Байқау нәтижелері 20 сәуірден кейін өтетін қорытынды жиында жария болады.