Вокзал жолаушылары қауіпсіз аймаққа көшірілді
Ақтөбе облысы бойынша меншікті тілші
Шалқар темір жол вокзалында «Ғимараттағы өртті сөндіру және адамдарды көшіру» тақырыбында өрт-тактикалық сабағы өтті.
№7 өрт сөндіру мекемесінің қатысуымен өткен шарада өрт сөндірушілер алдымен ғимараттың анықтама бөлігінде шартты түрде шыққан өртті сөндіруге ұмтылды. Түтін тез таралып, көшіру жолдарын жауып тастады. Вокзал қызметкерлері жолаушыларды сабырға шақырып, көмектің келуін күту тәсілін үйретті. Жолаушылармен бірге еденге жатып, қауіпсіз жолмен жүру жолдары көрсетілді. Құтқарушылар көпшілікке үрейге бой алдырмай сабырлы қимылдап, түтін мен иіс мейлінше аз болатын жолмен, яғни ғимараттың астыңғы бөлігімен жүру қажеттігін түсіндіріп, еденде еңбектеп жүру арқылы бір ізбен сыртқа алып шықты.
Өрт-тактикалық сабақтың негізгі мақсаты да осы – қауіп-қатер төнгенде вокзал қызметкерлері мен жолаушыларды қауіпсіз аймаққа көшіру. Өрт сөндірушілер құтқарылған адамдарға жедел түрде алғашқы көмек көрсетті. Іс-шара жоспарына сәйкес өрт туындаған жағдайда жеке құрамның іс-қимылы, қауіпсіздік ережесін қатаң сақтауы мен алғашқы өрт сөндіру құралдарын пайдалануы тәжірибелік әдістемелік ретінде көрсетілді.