Оқушыларға кәсіптік бағдар берілді
Атырау облысы бойынша меншікті тілші
Дүниежүзілік еңбек қорғау күніне орай Ақжайық белгі беру және байланыс дистанциясы мектеп оқушыларына арнап «Ашық есік» күнін өткізді.
Дистанция бас инженері Азамат Жансариев оқушыларды заманауи жабдықтармен жабдықталған Теңдік станциясының жұмысымен таныстырды. Оқушылар пойыздарды қабылдап-жөнелту, жүк және жолаушы пойыздарының айырмашылығы, белгі беру мен байланыс құрылғыларының, бағдаршам, бағыттамалы бұрмалардың жұмысы, қозғалыс қауіпсіздігін сақтау, темір жол арқылы тек рұқсат етілген жерлерден, аспалы көпірлерден өту сынды жайттардан хабардар болды.
Станция еңбек қорғау инженері Г.Тоқсанбаева қауіпсіздік ережелерін түсіндіріп, оқушылар бейнероликтер арқылы темір жолда болатын апатты жағдайларды көзбен көрді. Мектептің еңбек пәні мұғалімі Жанат Мусағалиеваның айтуынша, бүгінгі келіп отырған 9-сынып оқушыларына кәсіптік бағдар беріліп отырады. Соның ішінде теміржолшы мамандығына қызығушылығы бар оқушылар іріктеп алынып, олардың болашақ мамандығын таңдауына мүмкіндік жасалып отыр. Айта кетерлігі, ҰБТ тапсырудың қиындығы мен машақатынан қашып, 9-сыныптан соң колледжге түсіп, мамандық алуды қалайтын оқушылар аз емес. Сондықтан олар үшін бұл нағыз тәжірибе болмақ.