Ақтөбе вокзалынан өрт шығып, жолаушылар эвакуацияланды
Ақтөбе облысы бойынша меншікті тілші
Ақтөбе вокзалында өрт тұтанып, қызметкерлер мен жолаушылар тез арада эвакуацияланды. Вокзал маңы өрт сөндіру көліктеріне толып, аяқ асты абыр-сабыр басталып кетті...
Абырой болғанда мұның бәрі өрт сөндірушілердің кезекті оқу-жаттығуы болатын. Оқиға орнына арнайы барып, тілсіз жаумен күрескен өрт сөндірушілердің тактикалық іс-әрекетін бақыладық. Сценарий бойынша техникалық бөлмеден қысқа тұйықталу салдарынан өрт шыққан. «Жалын» жақын маңдағы жабдықтарға таралып, жоғары қабатты қою түтін басты. Дабыл қағылған сәтте теміржолдың өрт сөндіру пойызы мен қалалық құрылымдар лезде келіп жетті. Ақтөбе облысы ТЖД мен Ақтөбе станциясының өрт сөндіру пойызы арасындағы өзара іс-қимыл, адамдар көп жиналатын жерде оқыс жағдай тіркелгенде атқарылатын жұмыстар көрсетілді. Нәтижесінде зардап шеккен бір адам және автосаты арқылы төртінші қабаттан екі адам құтқарылды.
«Батыс аймақтағы ең үлкен вокзалдан жолаушыларды және вокзал қызметкерлерін төтенше жағдай туындағанда қауіпсіз жерге көшіру жұмыстарын көрсету – тактикалық жаттығудың мақсаты. Жаттығуда әрбір қимылдың кем-кетігі мұқият зерттеліп, ескертілді», – деді Ақтөбе мемлекеттік емес өртке қарсы қызметінің бастығы Әділ Құбаев.
