Қауіпті індет жұқтырған жолаушы пойыздан түсірілді (Фото)

Ақтөбе станциясында жолаушылар пойызының вагоны ағытылып алынды. Қауіпті індет жұқтырған жолаушы арнайы операциямен оқшауланып, жедел жәрдем көлігімен инфекциялық ауруханаға жөнелтілді.  

Науқаспен байланыста болған жолсерік, пойыз басшысы және сол вагондағы жолаушылар түсірілді. Осындай сценариймен жүргізілген оқу-жаттығу  дабылмен басталып, арнайы киімдегі мамандар оқшауланған вагон маңына кезектесіп келді.  

Ақтөбе станциясына жергілікті уақытпен сағат 15-50-де жеткен №33 «Алматы-Ақтөбе» жолаушылар пойызының №7 вагонында жолаушыдан аса қауіпті және карантинді инфекциялық ауруына күдікті жағдай тіркелгендігі туралы ақпарат түсті. Науқас Үндістанның Дели қаласында болған. Алматы қаласына ұшақпен келіп, Ақтөбеге қарай пойызға отырған. Науқасқа болжам диагнозы қойылғаннан кейін облыстық инфекциялық бөлімге жіберілді.    

Әрине бұл оқу-жаттығу шарасы болғанымен, оған шынайы қарау керек. Себебі дәл осындай жағдай орын ала қалса, дұрыс әрекет ете білу маңызды. Яғни мамандар шеберлігі шыңдалады. Карантиндік ауру туындаған жағдайда бірінші болып эпидемиолог, зертханашы, инфекционист-дәрігерден құралған арнайы бригада келеді. Науқасқа алғашқы медициналық көмек көрсетіледі. Кейін жедел жәрдем қызметінен ауруды оқшаулау группасы мен эпидемиологиялық бригада, ұлттық сараптамалық орталық мамандары кезегімен әрекет етуі тиіс.  

Жаттығудың осындай ұйымдастыру жұмыстары Ақтөбе бөлімшелік көліктегі санитарлық-эпидемиологиялық бақылау басқармасының бақылауымен өтті. Оған Ақтөбе станциясы желілік полиция бөлімінің, «Әскерилендірілген теміржол күзеті» ЖШС, «Жолаушылар тасымалы» АҚ «Батыс» жолаушылар тасымалы аймақтық филиалының қызметкерлері қатысты.