Сақтықта қорлық жоқ
Шымкент станциясындағы желілік полиция бөлімінің ұйымдастыруымен нашақорлықтан сақтандыру профилактикалық іс-шарасы өтті.
Алдымен Шымкент айналым локомотив депосының ұжымымен кездесіп, машинистер арасында әңгімелесу өткізген желілік полиция бөлімінің есірткі бизнесіне қарсы іс-қимыл басқармасының жедел уәкілі, полиция майоры Манас Шотанов және полиция капитаны Айбек Қалдыбек есірткінің зияны жайлы дәріс оқып, сонымен қатар оны таратудың баптары, оған тағайындалатын жаза туралы ақпарат берді.
Келесі кезекте пойыздарды аралап, жолаушылар арасында профилактикалық жұмыстар жүргізуді жалғастырды. 28 мамырда №11-12 «Шымкент-Алматы», №77-78 «Маңғыстау-Алматы», №41-42 «Атырау-Алматы» бағыттарындағы жолаушылар пойыздарында жолаушылармен кездесу өтті. Оған Шымкент қалалық желілік полиция бөлімінің бастығы, полиция майоры Нұрлыбек Райсов, взвод командирі полиция аға лейтенанты Самат Қадыров және әкімшілік полиция қызметкерлері қатысып, қазіргі қоғамның басты мәселелерінің бірі болып отырған нашақорлық дертінен сақтандыру парақшаларын таратып, жолаушыларды жол жүру ережелерімен таныстырды, жолда жарақат алып қалмау, жол жүру кезінде кездесіп қалатын әкімшілік және қылмыстық құқық бұзушылықтардың түрлеріне мысалдар келтіріп, басқа да түсіндіру жұмыстарын жүргізді.