Стратегиялық аумақта бөгде адамдардың бейқам жүрісі алаңдатып отыр
Ақтөбе облысы бойынша меншікті тілші
Ақтөбеде теміржол мекемелерінің басшылары мен желілік полиция қызметкерлері дөңгелек үстел басына жиналды. Басқосудың негізгі тақырыбы теміржол төңірегінде сақтық шараларының сақталмауы мен ереже бұзушылықтың көбеюі туралы болды.
Теміржолшылар мен тәртіп сақшыларын стратегиялық аумақта бөгде адамдардың бейқам жүрісі алаңдатып отыр. Олардың қауіпсіздік ережелерін өрескел бұзып, пойыздар қозғалысына кедергі келтіруі жылжымалы құрамдарды шұғыл тоқтату жағдайын да арттырған.
«ҚТЖ-Жүк тасымалы» Батыс аймақтық филиалының директоры Бөріхан Беркімбаев бастаған теміржолшылар, станция, вагон шаруашылығы, жолаушы тасымалы қызметінің басшылары, екінші тараптан Көліктегі полиция департаменті бастығы полиция полковнигі Бақытжан Малыбаев бастаған тәртіп сақшылары темір жол бойындағы қоғамдық тәртіп пен қауіпсіздікті арттыру бойынша қабылданып жатқан шаралар, жазатайым оқиғаларды алдын алу, жылжымалы құрамдағы жүктердің ұрлығын болдырмау, т.т. өзекті мәселелерді сөз етіп, кедергілерді жоюдың шешімін қарастырды. Жол бойында түсіндіру жұмыстарын, тұрғындармен кездесуді тоқтатпау қажеттілігі айтылды.
Бөріхан Сматуллаұлы бөгде адамдардың, төрт түлік малдың жолға шығып, қоршауларды бұзып кету дерегі азаймай отырғанын және ол КТЖ-ға үлкен шығын келтіріп отырғанын айтты. Осындай оқыс жағдайлардан өткен жылы локомотивтерге қанша зиян келіп, жолаушылар мен жүк пойыздарының жүру кестесі бұзылғанын айтып берді. Сондықтан бүгінгі таңда аса өткір мәселеге айналып отырған бұл келеңсіздікпен бірге күресуге шақырды.
Көліктегі полиция департаменті бастығы полиция полковнигі Бақытжан Малыбаев келеңсіздікпен бірге күресуге дайын екендерін жеткізді, сонымен қатар теміржол өткелдеріне көпір салып, ағаш төсемдермен жабдықтау бойынша жергілікті әкімдіктер мәселе көтеріп, ұсыныстар беруі тиіс деп санайды.