Тараз вокзалында бақылау күшейтілді
Тараз қаласы бойынша меншікті тілші
Жаз айында темір жолда жолаушылардың қатары артатыны белгілі. Осындай қарбалас сәтте вокзалдағы қауіпсіздік қызметі күшейтіле түсер.
Осыған орай Тараз вокзалында терроризм, бұзақылық, ұрлық-қарлықтың алдын алуда қадағалау күшейтіліп отыр. Тараз вокзалының бастығы Дидар Мүсіретәлиевтің айтуынша, аптасына екі рет техникалық оқу өткізіп, мамандарға нақты нұсқаулықтар беріліп отыр. ҰҚК өкілдері, Тараз желілік полиция бөлімінің бастығы, полиция полковнигі Қалжан Орынбековтің қатысуымен бірнеше дәріс өткен. Сондай-ақ болат жолдың бойындағы бос ғимараттар да жіті бақылауға алынған.
– Тараз вокзалында 24 сағат жолаушылар легі толастаған емес. Әсіресе жолаушы нөпірі күрт көбейген жаз маусымы басталғалы қадағалауды күшейттік, – дейді Тараз станциясы бойынша Корпоративтік қауіпсіздік, террористік қорғау қызметінің маманы Данияр Ташметов.