Қараусыз мал қозғалысқа қауіп төндіріп тұр

Аягөз өңірі теміржол қозғалысы бойынша біршама күрделі аймақ. Желі бойындағы қараусыз мал, жазатайым оқиғалар бұл аумақ бойынша күн тәртібінен түскен емес. Жағдай әсіресе, соңғы кезде шиеленісе түскен көрінеді.  

Бұл туралы жуырда  Аягөз станциясы мен Аягөз жол дистанциясы мекемесінің қызметкерлері және Семей станциясындағы желілік полиция өкілдері кездескен басқосуда айтылды. Жиынға  теміржолшылармен қатар әкімшілік полиция бөлімінің бастығы, полиция капитаны Рүстем Әбеуов, Аягөз ст. ЖПб-нің бастығы полиция  майоры А. Силямгазинов қатысты.  Сондай-ақ басқосуға Аягөз ауданының әкімі Сейілбек Искаков пен ауыл әкімдері де арнайы келіп қатысып, теміржолшылар қауымының уәжін тыңдады.  

Басқосуда бірінші кезекте пойыз қозғалысындағы қауіпсіздік мәселесі атап өтілді. Осы орайда қоғамдық қауіпсіздікті қамтамасыз етудің 2024-2028 жылдарға арналған тұжырымдамасы аясында жергілікті әкімдіктермен темір жол  қызметкерлері бірлесе әрекет етуге уағдаласты. Атап айтсақ, теміржолдағы шұғыл тежелу мен жазатайым оқиғалардың алдын алу мақсатында қос тарап желілік полиция қызметкерлерімен бірлесіп тұжырымдамадағы стратегиялық бағыттардың толық орындалуы үшін  ынтымақтастықта жұмыс атқаруы керектігі сөз болды. Аудан басшылығы мен теміржолшылар пікірі тыңдалды.

Жиын барысында айтылғандай, Аягөз өңіріндегі басты мәселе желі бойындағы қараусыз жайылған мал болып отыр. Бұл ретте аудан басшылығы жергілікті тұрғындарға тиесілі ауыл шаруашылығы жануарларын арнайы тіркеп, нөмірлеуді өз жауапкершіліктеріне алды. Аталмыш шара өз кезегінде пойыз қаққан түліктің иесін дереу тауып, айыппұл салып жазалауға, сонымен қатар, бүлінген жағдайда тепловоздың шығынын өтеп алуға мүмкіндік береді.

Сонымен қатар, ауылдық округ  әкімдері желілік полиция және теміржол қызметкерлерімен бірлесіп ауыл тұрғындарымен, шаруа қожалықтары иелерімен профилактикалық түсіндірме жұмыстарын жүргізуді жандандыратын болып келісті.