Рейд: Тұрғындар теміржолды кесіп өтуін доғарар емес
Ақтөбе облысы бойынша меншікті тілші
Жуырда Жіңішке станциясында болған суицид оқиғасынан соң жергілікті теміржолшылар мен желілік полиция қызметкерлері кезекті рейд өткізді.
Станция бастығының орынбасары, инженер-технолог және полиция инспекторларынан құралған топ қауіпті тұстарды аралап, тұрғындарға теміржолды белгіленген және жабдықталған, жаяу жүргіншілер өткелі, көпір, жол өтпесі, төсемдер арқылы, сонымен қатар «Жол арқылы өту» көрсеткіштері орнатылған жерлерде ғана өту қажеттігін ескертті. Жуырда болған қайғылы оқиғадан сабақ алуға шақырды.
– Пойыз 400 метр қашықтықта келе жатса, өтуге мүлдем тыйым салынады. «Тальго жүрдек пойызы көрінсе, жолдан 5 метрге дейін қашық тұру керек, ал жүк пойызы мен жолаушылар пойызы өткен уақытта 2 метрге дейін қашық тұруымыз шарт. Пойызға мінетін болсаңыз, пойыз толық тоқтамай тұрып жақындамайсыз және пойызға отыру, түсу тек перрон немесе отырғызу платформалары жақтан жүргізіледі» дегенді түсіндіру тобы әр жүргіншіге мұқият түсіндіріп, теміржол бойында жүру ережесімен қатар, орын алған оқыс оқиғалардан мысал келтіріп, сақтық ережелеріне мұқият болуға шақырды. Теміржолдың қаншалықты қауіпті аймақ екенін ескертуден кенде емеспіз, – деді Жіңішке станциясы бастығының орынбасары А.Жұмабаев.
Салғырттық пен немқұрайлылықтың кесірінен адамдар түрлі апаттарға душар болып жататыны жасырын емес. Алайда, қауіптің алдын алу жұмыстары үздіксіз жүргізіліп, ескертіліп жатса да тұрғындар теміржолды кесіп өтуін доғарар емес.
Рейд барысында темір жол бойын кесіп өтпек болған 2 адамға Әкімшілік Кодекстің 559-бап 5-бөлігі бойынша әкімшілік жауапкершілікке тартылатыны ескертіліп, профилактикалық әңгімелер жүргізілді.