Бейнеу станциясында биыл шұғыл тежеу 18 рет қолданылған
Маңғыстау облысы бойынша меншікті тілші
Жолға шыққан төрт түлікті торуылдау – мал бағатын ауылдар мен шаруа қожалықтарына жақын теміржол учаскелеріндегі теміржолшылардың қосымша жұмысына айналғандай.
Малдың әлегімен артық әуреге түскен Бейнеу жол дистанциясының жұмысшылары желілік полиция өкілдерімен бірге тұрғындармен жақында тағы да кездесті. Бейнеу жол дистанциясының қызметкерлері мен Бейнеу станциясындағы жерілікті полиция бөлімі инспекторлары Бейнеу-Үстірт станциялары аралығындағы темір жолға жақын орналасқан шаруа қожалықтарын аралады.
Теміржолда қараусыз жүретін малдың салдарынан шұғыл тежеу қолдану, мал басудың алдын алу және олардың теміржол аумағында қадағалаусыз қалуына жол бермеу мақсатында түсінік жұмыстарын жүргізді.
– Мал иелерінің өз меншігіндегі төрт түлікке бей-жай қарауы проблема туындатып отыр. Беймезгіл уақытта көше кезіп, иесіз жүрген жануарлар темір жолға шығып, пойыздардың жүруіне кедергі келтіруде. Жыл басынан бері 18 рет шұғыл тежеу болды, барлығында мал басылды. Сондықтан әрбір тұрғынды темір жолдағы қауіптің алдын алуға шақырамыз. Темір жол бойында қараусыз жүргені үшін мал иелері тиісті жергілікті өкілді органдар бекіткен ауыл шаруашылығы жануарларын жаю қағидаларын бұзу дерегі бойынша ҚР заңнамасында қарастырылған әкімшілік жауапкершілікке тартылатынын ескертеміз, – дейді Бейнеу станциясындағы желілік полиция бөлімінің бастығы Насыр Дербісәлиев.