Қараусыз мал үшін қатаң жаза
Абай облысы бойынша меншікті тілші
Ел шығысында күн тақырыбынан түспей тұрған мәселелердің бірі – желі бойындағы қараусыз мал. Бұл жайт әсіресе Дегелең – Жаңа-Семей телімінде мейлінше өзекті болып тұр.
Оның себебі дәл осы телім бойында ауылдық елдімекендер мен ірі қара өсіретін шаруа қожалықтары өте көп. Олардың кейбірі тіпті желі бойынан небары 500 метр жерде ғана орын тепкен. Оның үстіне күзгі маусымда аталмыш теліммен көмір тиелген жылжымалы құрамдар жиі жүйткиді. Сағатына 120-140 шақырымдық жылдамдықпен қозғалатын Тальго пойыздары тағы бар. Яғни қозғалыс жиілігі аса жоғары «Батыс тармақта» ендігі аралықта қатаң шаралар қолдану керек.
Осыған орай жақында Семей станциясындағы желілік полиция бөлімінің тәртіп сақшылары аталмыш телім бойындағы Ертіс және Прииртыш сынды бірқатар ауылдар тұрғындарымен, жеке шаруа қожалықтарымен арнайы кездесу өткізді.
Жиын барысында Дегелең станциясындағы желілік полиция бөлімшесі басшысы, полиция майоры Р.Мақанов пен Семей станциясындағы бөлімнің ӘПБ бастығы, полиция капитаны Р.Әбеуов Ауыл шаруашылығы министрлігінің 145-бұйрығымен таныстырып, төрт түліктің есепке алынып, сырғаланып, таңбалануы керектігін түсіндірді.
Сонымен қатар ендігі уақытта теміржол бойына мал жайған шаруалар ҚР ӘҚБтК-нің 559-бабы бойынша қатаң жазаланатынын ескертті. Сондай-ақ түсіндірме қағаздар таратылып, қатысушылардан ескертілгені жайлы қолхаттар алынды.