Күкірт қышқылы тамған жер күйіп түтіндей бастады...
Атырау облысы бойынша меншікті тілші
Әдеттегідей қарбалас жұмыс жүріп жатқан Атырау станциясына №984 жүк пойызы келді. №16 жолда құрамадан жергілікті вагондарды сұрыптау және маневр кезінде пойыз құрастырушы цистернаның астыңғы жағынан тамып тұрған ақшыл-сары түсті сұйықтықты көріп, анықтау барысында қолын күйдіріп алғаны рация арқылы станция кезекшісіне хабарланды.
Кезекші жағдайды станция басшылығы мен РЦУП-1 диспетчерлік бөліміне хабарлайды. Күкірт қышқылы тамшылаған жер күйіп түтіндей бастап, пойыз құрастырушы сол түтінге уланып оқиға орнында құлайды. Түтін айналадағы басқа да адамдардың улану қаупін тудырады. Кезекші барлық құтқару бөлімдеріне шұғыл хабарлама жіберіп, бірінші болып Атырау облысы санитарлық-эпидемиологиялық бақылау бөлімшесінің радиациялық-химиялық байланыс бөлімі келеді. Олар атмосфералық ауадағы улы химикаттар мөлшерін анықтап, қауіпті аймақ ретінде тиісті белгі-жалаулар орнатты. ӘТЖК және желілік полиция қызметкерлері оқиға орнын қоршауға алды. Атырау облысы ТЖД Өрт сөндіру және Атырау қалалық жедел құтқару қызметінің 6 қызметкері жұқтыру аймағынан зардап шеккен пойыз құрастырушыны алып шығып, оған алғашқы медициналық көмек көрсетілді. Ақжайық станциясының өрт сөндіру пойызы түтіндеген тұсқа су бүркіп, өрттің алдын алады.
Атырау жүк тасымалы бөлімшесінің азаматтық қорғаныс және төтенше жағдайлар жөніндегі инженері Нұрлан Сұлтанғалиевтің айтуынша, бұл жылына екі рет өткізілетін жоспарлы өрт сөндіру оқу-жаттығуы.
«Теміржол көлігімен қатты әсер ететін улы заттарды тасымалдау кезінде қауіпті жүктердің төгілуіне байланысты туындаған төтенше жағдайларды жою кезіндегі іс-қимылдарға азаматтық қорғаныс мемлекеттік жүйесінің басқару органдарын, күштер мен құралдарын дайындау» тақырыбында шартты түрде өткен бүгінгі оқу-жаттығу ойынына қалалық деңгейдегі өртке қарсы қызмет және ең алдымен өзіміздің темір жолдың өрт сөндіру пойызы, әскерилендірілген күзет, желілік полиция, бөлімше санитарлық посты, қалпына келтіру пойызы, электрмен қамту, жол, байланыс дистанциялары мамандары қатысты. Барлығы 150 адам, 1 пойыз және 30 техника осы шараға жұмылдырылып отыр. Бұл жеке құрам мен өртке қатысы бар құрылымдық мекемелердің төтенше жағдайға дайындығын тексеру әрі шыңдау үшін, апатты жағдайда шұғыл шешім қабылдауға үйрену үшін қажетті шара, – дейді ол.
Сөйтіп, улы заттармен және тілсіз жаумен күрес әп-сәтте-ақ басталып, жедел түрде сөндірілді. Алдымен Ақжайық өрт сөндіру пойызының командасы «өртке оранған» вагонды сумен салқындатып тұрды, өйткені мұнай өнімдері, соның ішінде күкірт қышқылы тез тұтанғыш әрі сөнуі қиын. Сол себепті көбікті көлік жеткенше осылай амалдай тұрып, одан кейін вагон қалың көбікпен жабылып, өрт ошағы толық сөндірілді.
«Осы шараға станцияның жүк тиейтін бөлігіндегі екінші жолды бөліп, оқу-жаттығудың ойдағыдай өтуіне барлық жағдай жасадық. Және өзіміз де қатысып, алда-жалда апатты жағдай орын алғанда, улану қаупі туындағанда қалай қимылдау қажеттігін тағы да пысықтадық», – дейді станцияның бас инженері Бекжан Жиенбетов.
Жоспарлы оқу-жаттығу барлық құрылымдардың төтенше жағдайға дайын екенін көрсетті.