Ақтөбеде шұғыл тежеу азаймай тұр
Ақтөбе облысы бойынша меншікті тілші
Стратегиялық аймақтарда бөгде адамдардың жүруі мен жолға мал шығып кету жайттары азаймай тұр. Теміржолдың тәртіп сақшылары осылай дабыл қақты.
Ақтөбе станциясында қауіпсіздік акциясын өткізген көліктегі полицейлердің мәліметінше, жолға шыққан мал мен жанның кесірінен аймақта жыл басынан бері жолаушы және жүк пойыздары 49 рет жедел тежегіш беріп, шұғыл тоқтауға мәжбүр болған. 20 жағдайда адамдардың теміржолды белгіленбеген жерден өтуі себеп болса, 29 дерек теміржолға мал шығып кетуінен болған.
Теміржолшылар мен желілік полиция бөлімінің қызметкерлері акция барысында мектептер мен колледждерге барып, өткелдерде өте сақ болуды ескертіп, құлаққаппен жүрудің қауіпті екенін түрлі мысалдармен жеткізді. Сонымен қатар теміржолға жақын орналасқан тұрғындармен жиын өткізіп, профилактикалық түсіндірме жұмыстары жүргізілді.
«Жолаушыларға теміржол көлік объектілерінде бейнероликтер көрсетіліп, ақпараттық парақшалар таратылды. Акцияның мақсаты – темір жол бойында жылжымалы құрам қауіпсіздігін қамтамасыз ету және жарақаттану фактілерінің алдын алу», – деді Ақтөбе ЖПб-нің баспасөз қызметкері Роза Төлегенқызы.