Ақтөбе вокзалында «Тосқауыл» операциясы өтті

Қауіпсіздікті қамтамасыз етуге бағытталған жоспарлы іс-шаралар аясында Ақтөбе станциясының аумағы мен теміржол вокзалында «Тосқауыл» операциясы өтті.

ҰҚК қызметкерлері мен Ақтөбе станциясындағы желілік полиция бөлімі ұйымдастырған шара барысында көші-қон заңнамасын бұзған 2 шетел азаматы ұсталды. Күдікке ілінген шетелдіктер әкімшілік жауапкершіліктен құтылуға әрекеттенген. Алайда жоспарлары іске аспады, еліміздің Көші-қон заңнамасын бұзғаны үшін ӘҚБтК-нің 517-бабының 4-бөлігі бойынша әкімшілік жауапкершілікке тартылды. Сот үкімімен біреуіне 25 АЕК айыппұл салынып, екіншісіне ҚР аумағынан шығару үкімі шықты.  

Елімізде жолаушылар қауіпсіздігі қатаң бақылауда. Стратегиялық аймақтағы тәртіптің сақталуы мейлінше бақылауға алынған. Теміржол вокзалының айналасында, ғимарат ішінде бейнебақылау камералары бар.  

Сонымен қатар осы күндері Төтенше жағдайлар департаментінің қызметкерлері қаладағы жатақханалар мен хостелдерге рейд кезінде теміржол вокзалы маңындағы нысандарға да тиянақты тексеру жүргізді. Себебі мұнда көбіне сырттан келетін қонақтар аялдайтындықтан, ұрлық-қарлық жиі болады. Көпшілікке өрт қауіпсіздігін сақтау ережелері түсіндірілді.  

Теміржол вокзалының үшінші қабатында орналасқан қонақүй бөлмелері бос тұр. Вокзал қызметкерлерінің айтуынша, қыс мезгілінде көп адам бола бермейді. Жатын орындар босап қалады. Ал жазғы уақытта орын табу қиын. Жолаушылар үшін вокзалдағы демалыс орындары тиімді әрі қолжетімді. Мұнда тазалық әрі қауіпсіздік қатаң сақталған. Десе де, кемшіліктер анықталып, ескертулер берілді. Төтеншеліктер вокзалдағы демалыс бөлмелерінде өрт сөндіргіштер жеткіліксіз екенін ескертті. Оқыс оқиға болған кезде шұғыл шығу қиындық туғызады, эвакуациялық жолдарды жиһаздармен жауып тастаған. Эвакуациялық жоспарлар бойынша ғимараттан шығатын жолда кедергі болмау керектігі түсіндірілді. ТЖД қызметкерлері аталған кемшіліктер бойынша вокзал басшылығына нұсқама беріліп, кемшіліктер аз уақыттың ішінде жойылуға тиіс екенін айтты.