Темір жол төсемін кесіп өткен 1000-нан астам азамат жауапкершілікке тартылды

Осы жылдың 8-12 қаңтары аралығында Көліктегі полиция департаментінің қызмет көрсету аумағында «Көліктегі қауіпсіздік» атты кең ауқымды акция өтуде, деп хабарлайды Rail-news.kz.

Айтулы акцияның мақсаты – көлік объектілерінде қауіпсіздікті қамтамасыз ету, қоғамдық орындарда жасалатын қылмыстар мен жазатайым оқиғалардың алдын алу.

Қаңтар айының бірінші онкүндігінде жылжымалы құрамның астына 4 азамат түскен, оның ішінде 2 дерек өліммен аяқталды. Темір жол төсемін белгіленбеген жерден кесіп өткендері үшін 1024 азамат әкімшілік жауапкершілікке тартылды.

Мәселен, 9 қаңтарда Ақмола облысының «Қара-Адыр» станциясында жүк пойызының машинисі теміржолда бөгде адамның болуына байланысты шұғыл тежеу қолданды.

Тексеру барысында көлік полицейлері белгіленбеген жерден темір жолды кесіп өткен Ақмола облысының 69 жастағы тұрғынын анықтады.

Құқық бұзушы ҚР ӘҚБтК 559-бабының 5-бөлігі, яғни белгiленбеген жерлерде темiржол арқылы өту бойынша әкімшілік жауапкершілікке тартылды. Бұл баптың санкциясы ескерту жасауға немесе үш айлық есептiк көрсеткiш (11 076 теңге) мөлшерiнде айыппұл салуға әкеп соғады.

Теміржол көлігі объектілеріндегі қауіпсіздік ережелеріне сәйкес белгіленбеген жерлерден темір жолды кесіп өтуге тыйым салынатынын еске саламыз.

Темір жолдан өту үшін арнайы жабдықталған жаяу жүргіншілер өткелдерін (туннельдер, көпірлер) пайдалану қажет.