Темір жол қауіпсіздігіне қасақана қауіп төндірген мал иелеріне 18 460 теңге айыппұл қарастырылған
Ақтөбе облысы бойынша меншікті тілші
2024 жылдың алғашқы екі аптасында Қандыағаш жол дистанциясы аумағында жолға малдың шығып кетуіне байланысты 8 оқиға тіркелді. Оның үш жағдайында жылжымалы құрам малды басып кеткен.
Ал өткен жылы 200-ден аса мұндай жағдай тіркелді. Теміржолшылар қауіпсіздікке қатысты заң шараларын күшейту қажет деп санайды.
Қандыағаш жол дистанциясының басшылығы тарапынан желілік полиция қызметкерлерімен бірлескен рейдтер, арнайы акциялар, түсіндіру жұмыстары ұдайы өткізіліп келеді. Бірақ нәтиже аз. Малдың жолға шығып кету оқиғасы азаймай тұр. Әсіресе Қандыағаш-Шұбарқұдық, Шұбарқұдық-Қарауылкелді, Қарауылкелді-Сағыз, Қандыағаш-Тоқмансай телімдерінде бақташысыз жүрген мал көп. Оның ішінде Разъезд.313 – Разъезд.312, Разъезд.142 – Кенжалы, Тоқмансай – Бақай аралықтарында мал басу оқиғалары жиі тіркелген.
Өткен жылы иесіз малдың жолға шығып кетуіне байланысты 217 оқиға тіркеліп, оның ішінде 9 жағдайда мал басылған. Дистанциядағы кейбір бригадалар күні-түні жолды малдан қорумен айналысып жүр. Өлген малдың иесін таңбасы немесе GPS арқылы анықтап, хабарласқан жағдайдың өзінде мал иелері жауапкершіліктен жалтарып, мойындаудан бас тартатын көрінеді.
«Жолдың жиегінде жүрген малдың иесін тауып, хабарласқанның өзінде айдап алып кетуге асықпайды. Ішкі істер қызметкерлері мен әкімшілік өкілдерімен біріккен жұмыстар да нәтижесін бермей отыр. Қолданыстағы заңда темір жол қауіпсіздігіне қасақана қауіп төндірген мал иелеріне 18 460 теңге айыппұл қарастырылған. Оны дер кезінде төлесе, айыппұл көлемі 50 пайызға азаяды. Жеке қожалық иелеріне бұл айыппұлды төлеп, ары қарай малын тағы қараусыз қалдырады. Сондықтан біздің ұсынысымыз, бұл айыппұлды ұлғайту немесе жағдай қайталанса, айыппұл мөлшерін бірнеше есеге арттыру қажет. Мүмкін сол кезде мал иелері жауапкершілікті сезінер. Себебі қазіргі таңда мал ұстайтын шаруа қожалықтары көбейген, темір жолды малдан толықтай қорғау мүмкін болмай отыр», – деді Қандыағаш жол дистанциясы басшысының орынбасары А. Рыспаев.
Айтуынша, қазіргі таңда теміржолшылар тарапынан әлеуметтік желілерде бейнетүсірілімдер таратылып, жергілікті аудан әкімдеріне тиісті шара қабылдау жөнінде хаттар жолданған.