Вагон қараушы қос бірдей ақау тапты (Фото)

Қазалы вагон депосының Сексеуіл тіректі техникалық қызмет көрсету бекетінде еңбек ететін вагон қараушы Есбол Жұбаназаров бекетке аялдаған пойыздарға сапалы техникалық қызмет көрсету кезінде бір вагоннан екі бірдей ақау тауып, айды аспанға бір-ақ шығарды.  

Қырағы көз вагон қараушы Сексеуілдегі ТТҚК бекетінде еңбек ете бастағалы екі жылдың көлемі болған. Былтырғы желтоқсан айының 30-ы күні аға вагон қараушы Еркінбай Тлеуовтың үйлестіруімен ауысымды қабылдап алған Есбол күнделікті атқаратын жұмысына кірісіп кетеді. Түс ауа, сағат 15.02 кезінде 7-жолға келіп тоқтаған №3223 пойыздың 12-вагонын тексеру кезінде екі арбашасының да бүйір жақтауынан бір емес, екі ақауды табады. Дереу аға вагон қараушыға хабар берген Есбол вагонның астына кіріп, тағы да мұқият қарай бастайды. ТТҚК пунктінің басшылары мен жауапты тұлғалар да келіп жетіп, вагонның ақаулы екеніне көздерін жеткізген соң, вагон құрамнан ажыратылған.    

– Алдымен вагонның оң жақтағы 1-арбашасының бүйірлік рамасының бағыттауыш ось-қорабы үстінде диаметрі 8 мм, тереңдігі 24 мм тесікті көзім шалды. Онда марка-12 №4741-2001ж деген таңба басылыпты. Және де осы вагонның сол жағындағы бірінші арбашаның бүйір рамасының ось-қорапшасының үстінен көлемі 8 милиметр, тереңдігі 12 мм тесік-раковина тағы табылды. Бұл бүйір жақтауда 12 №12177-1997ж деген таңба соғылыпты, – дейді вагон қараушы-жөндеуші Есбол Жұбаназаров.

Ақаулы №50078591 вагон ресейлік «Нефтетранссервис» АҚ меншігіне тіркелген, екі жыл бұрын Челябинск станциясында жөндеуден өткізілген екен.  

 – Есбол Жұбаназаров бұған дейін де біздің ұжымда жұмыс істеп кеткен тәжірибесі бар вагон қараушы. Екі жылдың көлемінде бізге қайта келіп бұрынғы кәсібін жалғастыруда. Оның бір вагоннан екі бірдей ақау тапқаны бәрімізге сенсация болды. Ілуде бір кездесетін оқиға ғой, – дейді Сексеуіл ТТҚК бекетінің бастығы Қайрат Ысқақов.