Лаңкестіктің алдын алу мәселесі сөз болды...
Абай облысы бойынша меншікті тілші
Қоғамдық көлік қатынасындағы күн тақырыбынан түспейтін мәселелердің бірі кездейсоқ қауіп пен террорлық актілердің алдын алу, сақтық шаралары екендігі даусыз.
Оның сыртында діни экстремизм мен радикализмге жол бермеу де маңыздылығын жоймай келеді. Жуырда семейлік теміржолшылар «Абай облысының жолаушылар көлігі және автомобиль жолдары басқармасы» ММ-мен бірлесіп діни экстремизм мен терроризмге қарсы іс-қимыл бойынша профилактикалық жұмыс шеңберінде кеңес өткізді. Бөлімше басшысы Алмас Сейсемқанов қатысқан жиынға азаматтық қорғаныс саласына жауапты мамандар, жалпы теміржолшылар көп жиналды.
Жиын барысында ішкі істер басқармасының өкілі террорлық қауіптіліктің алдын алу, стратегиялық маңызды нысандардағы қауіпсіздік шаралары туралы кеңінен сөз қозғады. Сонымен қатар жиын барысында киберқауіпсіздік, соңғы уақыттары жиі көрініс таба бастаған телефон терроризмі жайлы да сөз өрбіді.
Басқосуда ҚР Заңнамасы бойынша лаңкестіктің алдын алу және экстремистік сипаттағы құқықбұзушылықтарға жол бермеу шараларын ұйымдастыру жайында да сөз болды. Терроризм мен экстремизмге қарсы тұрудағы нормативтік-құқықтық актілер таныстырылды. Соның аясында теміржол вокзалы, автобекет сынды қоғамдық орындардан күдікті зат табылған жағдайдағы іс-әрекет бойынша да түсінік берілді.
Ал дін мәселелерін зерттеу орталығының теологы Мақсат Ботаханов қоғамның ұйытқысы саналатын береке-бірлік, бір ұстанымның аясында болудың маңыздылығын жеткізді. Діни сенім бойынша кең көлемде түсіндіріп берді. Ең бастысы тұрақтылыққа төнер қауіп діни экстремизм сынды қоғам дертімен бірлесіп күресу жайлы айтты.
Жиын барысында тақырып аясын қамтитын тағы да бірқатар мәселелер жөнінде сөз қозғалып, көпшіліктің сұрақтарына жауап берілді.