Темір жол – қауіпті аймақ
«Қазақстан теміржолшысы» газетінің тілшісі
Адамдардың жол жүру ережесін бұзуы және рельсті жолдың үстіне бөгде заттарды қалдырып кетуі пойыздардың шұғыл тоқтауына себеп. Биыл жыл басынан бері Астана жол дистанциясына қарасты теміржол телімдерінде машинистер 23 рет шұғыл тежеу жасаған.
Соның ішінде 15 жағдайда жабайы жануарларды басу фактісі тіркелсе, үй жануарларын басу 8 рет болған. Дистанция қызметкерлері темір жолды тек белгіленген, рұқсат етілген жерден өтуді ескертеді. Соның өзінде жақындап қалған пойыздың бар-жоқтығына көз жеткізіп алу керек.
– Өз өміріңізге қауіп төндірмес үшін ешқашан жылжымалы құрамның астынан өтпеңіз. Жолаушылар платформасынан секірмеңіз. Өткелдерде бағдаршам жолдан өтуге рұқсат бермейтін белгі берсе, шлагбаум қалай тұрғанына қарамастан жолдан өтпеген жөн. Ішімдік ішіп алып, теміржол маңайында жүрмеңіз. Әуе желілері мен жасанды имараттар, ток сымдары бар жерге жақындамаңыз, – дейді аталған дистанцияның бас инженері Төленді Шантекеев.
Сонымен қатар жолшылар әдеттегідей жолға мал шығу мәселесін де алға тартумен келеді. Пойыздар қозғалысы қауіпсіздігін қамтамасыз ету және мал жаю кезінде малдың амандығы үшін мал иелері мен оларды бағушылар мына Ережелерді міндетті түрде сақтауы керек:
Біріншіден, малды теміржолға жақын жайған кезде байлап бақса, теміржол төсемінен 300 метр қашықтықта жүруге болады, ал 2000 метр қашықтыққа дейін бақса, үнемі бақылауда ұстау керек. Сонымен қатар малды тек арнайы өткелдер, өтпежолдар, мал айдайтын жерлер арқылы ғана өткізу керек. Малды темір жолдан қараңғыда, тұманда, жел мен боранда кесіп өтуге болмайды.