Атырауда өртке қарсы оқу-жаттығуы өтті
Атырау облысы бойынша меншікті тілші
Ганюшкино – Ресей мен Қазақстанды байланыстыратын үлкен станция. Жуырда станцияға қарай №5 бекеттен жөнелтілген жолаушылар пойызында электр жабдығы түтіндеп, өрт шықты.
Оны байқаған жолсерік машиниске, ол станция кезекшісіне хабарлайды. Ганюшкино станциясының кезекшісі вагонды дереу арнайы оқшауланған 26-шы жолға шығарады да Ганюшкино станциясы өрт сөндіру пойызы жанып жатқан вагонды өшіруге кіріседі. Бірақ сол уақытта бір адам жарақат алып үлгереді. Оған Азаматтық қорғау құрылымының санитарлық пост қызметкерлері алғашқы медициналық көмек көрсетіп, 103 жедел жәрдем қызметкерлерін күтеді. Шұғыл жеткен олар науқасты ауруханаға алып кетеді.
Атырау жүк тасымалы бөлімшесінің азаматтық қорғаныс және төтенше жағдайлар жөніндегі инженері Нұрлан Сұлтанғалиевтің айтуынша, бұл – жылына екі рет болатын жоспарлы өрт сөндіру оқу-жаттығу.
– «Жолаушылар пойызында өрт шыққан жағдайда пойызды оқшаулап, жолаушыларды қауіпсіз жерге шығарып, өртті сөндіру кезінде туындаған төтенше жағдайларды жою кезіндегі іс-қимылдарға азаматтық қорғаныс мемлекеттік жүйесінің басқару органдарын, күштер мен құралдарын дайындау» тақырыбында шартты түрде өткен бүгінгі оқу-жаттығуға Ганюшкино өрт сөндіру пойызынан 12 адам, станцияның азаматтық қорғау құрылымдарынан 4 адам, Әскерилендірілген теміржол күзетінен 8 адам, ЭЧдан 3 адам, аудандық өрт сөндіру бөлімінен 10 адам, жедел жәрдем қызметінен 4 адам, 1 пойыз және 10 техника осы шараға жұмылдырылып отыр. Өрт 10 минутта сөндірілді. Бұл жеке құрам мен өртке қатысы бар құрылымдық мекемелердің төтенше жағдайға дайындығын тексеру әрі шыңдау үшін, апатты жағдайда шұғыл шешім қабылдауға үйрену үшін қажетті шара, – дейді ол.