Су тасқыны: Семейлік теміржолшылар күшейтілген режимге көшті

Бүкіл Қазақстанды әбігерге салған көктемгі қызыл су тасқыны семейліктерді де күшейтілген режимде жұмыс жүргізуге мәжбүрлеуде. Өткен аптада желі бойында қарғын судан келер қауіп күрт артты. Теміржолшылар қозғалыс қауіпсіздігін сақтау мақсатында қырағылық шараларын күшейтіп,  жұмыстарын ширата түсті.

Ауа температурасының күрт көтерілуі себепті әсіресе Аягөз-Жарма-Жаңғызтөбе, Шар-Жаңа-Семей, Семей-Белағаш телімдері бойынша қауіп әлі де бар. Аягөз, Үшбиік, Шар станцияларының шеткі көшелеріне сай-саладан аққан қызыл су кіріп те үлгерді. Аталмыш бағыттағы желі бойымен өтетін автомобиль жолдарының кейбір бөліктерін де су шайып, көпірлер қирады. Соның себебінен автокөліктер   қозғалысы шектелді. Десек те, қызыл су теміржол төсемдеріне залал келтіре алған жоқ. Қозғалыс барысы штаттық режимде жүргізілуде.  

Семей магистральдық желі басшылығы жергілікті атқарушы органдармен бірлесіп, облыс аумағындағы тірек гидротехникалық құрылыстардың және су объектілерінің жай-күйіне күнделікті мониторинг жүргізіп жатыр. Бұл орайда құрылған жұмыс тобы өңірдегі еріген қар сулары жиналған аймақтарды, соның ішінде биылғы жылғы су тасқыны кезеңінде ықтимал қауіпті орындарды тұрақты түрде тексеруде.  

Бүгінгі таңда ел шығысы бойынша барлығы 95 Гидротехникалық құрылыс бар екен. Оның біршамасы желі бойына таяу орналасқан. Қазір олардың барлығына дерлік тәуліктік бақылау орнатылған.  

Қазіргі күні желі бойындағы ахуал қалыпты. Төніп тұрған қауіп жоқ. Басты себеп, НЖС-6 бөлімшесіне тиесілі 440 көпір, 368 құбыр, 181 км арық, 1216 км су жүретін арналар қардан толық аршылып, тазаланған болатын. Мұнымен қоса қажетті жағдайда шұғыл жұмылдыру үшін арнайы техникалар да толығымен даяр тұр.  

Әйтсе де, бөлімшеге қарасты Аягөз ауданында жергілікті жағдайдағы төтенше жағдайдың жариялануына байланысты теміржол мекемелері тұрғындарға көмекке келуде. Мәселен, осы өңірде тасқын су кезінде жоғалған үш азаматты іздестіруге еріктілермен қатар теміржолшы жастар да тартылды. Бұл ретте Аягөз локомотив пайдалану депосының жастары дрон аппаратын да пайдалануда.  

Станциялар басшылары жергілікті атқарушы билік өкілдерімен және төтенше жағдайлар қызметімен тығыз байланыста. Қажетті жағдай туындаса, тұрғындарды эвакуациялауға да дайын.

– Жаңғызтөбе станциясының тұсындағы республикалық маңыздағы автокөлік жолының көпірін су шайып әкеткенімен көп ұзамай қалпына келтірілді. Өңірдегі барлық жол айрықтарына кезекшілік қойып, жергілікті әкімдікпен бірлесіп жұмыс жүргізіп жатырмыз. Кез келген жайтқа дайынбыз, – дейді бұл орайда Жарма аудандық мәслихатының депутаты, Жаңғызтөбе станциясының бастығы Азамат Нұрғалиев. Айта кетсек, бұл өткен аптада Абай облысы бойынша су тасқыны қаупі артқан ең күрделі аумақтардың бірі болатын.

Қазіргі күндері Семей ЖТ бөлімшесі бойынша, су шаю қаупі ең жоғары аумақтар ретінде Жаңа-Семей және Аягөз жол дистанциясының қарамағындағы телімдер саналады. Сондықтан ПЧ-40 пен ПЧ-42 жолшыларына күш түсіп тұр.

Әйтсе де, жағдай кез келген уақытта өзгеруі ықтимал. Себебі көршілес Шығыс Қазақстан облысындағы Алтай тауының сілемдеріндегі қардың 80 пайызы әлі еріген жоқ. Ертіс бассейніндегі өзендердің көтерілу қаупі әлі де сақталып отыр. Демек, сын сағат алда...