Атырауда жоспарлы жаттығу өтті
Атырау облысы бойынша меншікті тілші
Атырау жүк тасымалы бөлімшесінің азаматтық қорғаныс және төтенше жағдайлар бөлімінің жоспарына сәйкес Ақжайық станциясында өрт сөндіру бойынша оқу-жаттығу өтті.
Станцияда қалыпқа келтіру пойызының гаражынан өрт шығып, жедел хабарлама арқылы Ақжайық станциясының кезекшісіне, ол өз кезегінде басшылыққа және пойыз диспетчеріне, қалалық өрт сөндіру қызметіне, Ақжайық өрт сөндіру пойызына хабар берілді.
«Өрт таңертеңгі 10:00 шамасында шыққан, 10 мин шамасында әскерилендірілген темір жол күзеті келіп сол жерді «қоршауға» алды. 13 минут арасында Ақжайық станциясының азаматтық қорғау құрылымдары, өрт сөндіру пойызы, 15 минутта қалалық өрт сөндіру қызметінің 1 авто цистерна, 1 АШ-7 көлігі жетті. Ақжайық өрт сөндіру пойызы жауынгерлік қанат жайып, қалалық өрт сөндіру қызметімен бірге өрт сөндіруге кірісті. Зардап шеккен 1 адам – Ақжайық қалпына келтіру пойызының қызметкері. Бірақ ол дәрігерлік көмектен бас тартты, өрттің түтініне уланған екен. 10:20 шамаларында өрт толықтай өшірілді» дейді бөлім инженері Нұрлан Сұлтанғалиев.
Өрт сөндіруге Ақжайық сигнализация және байланыс дистанциясы, Ақжайық станциясының электрмен жабдықтау бөлімі, әскерилендірілген теміржол күзеті, Атырау қосалқы бөлімінің Азаматтық қорғау құрылымдары атсалысты. Барлығы 7 техника, 50 адам қатысты. Бұл – жеке құрам мен өртке қатысы бар құрылымдық мекемелердің төтенше жағдайға дайындығын тексеру әрі шыңдау үшін өткізіліп тұратын шараның бірі.