Жол бойындағы төрт түлік жолаушылардың өміріне қауіп төндіріп тұр
«Қазақстан теміржолшысы» газетінің тілшісі
Теміржол маңында жайылып жүрген төрт түлік қозғалыс қауіпсіздігі үшін проблемаға айналғалы қашан. Биылғы жылдың басынан бері жолаушылар және жүк пойыздарының машинистері тарапынан қауіп дабылының 575 фактісі тіркелген.
«ҚТЖ» ҰК» АҚ компаниясы темір жолға қараусыз малдың шығу фактілері көбеюіне алаңдаулы. Бұл жүк пойыздарының қауіпсіздігіне, жолаушылардың өміріне қауіп төндіріп қана қоймай, қауіпті жүктерді тасымалдау кезінде вагондардың рельстен шығып кетіп, қоршаған ортаға зиян келтіруі ықтимал. Әрине, теміржолшылар тарапынан пойыздардың қозғалыс қауіпсіздігінің бұзылуының алдын алған жұмыстар белсенді жүргізілуде. Магистральдық желі дирекциясы алға тартқан дерекке сүйенсек, жыл басынан бері еліміз бойынша малдың жолға шығуының алдын алу мақсатында 6 мыңға жуық адам қамтылған 125 жиын өтіп, 11282 мал қожайыны малды бағу және темір жол арқылы өткізу ережелерімен танысқан.
ҚР Әкімшілік құқықбұзушылық Кодексінен 9835 үзінді көшірмесі таратылып, бұқаралық ақпарат құралдарында 30 шақты мақала ұйымдастырылған. Бұдан бөлек, әкімдіктер, ЛОП, РОВД, ИТК, Мемлекеттік кеден комитеті өкілдерінің қатысуымен дөңгелек үстелдер өткізілген. Бірақ қабылданған және жүргізіліп жатқан іс-шараларға қарамастан, темір жол бойына қоршау орнатылған жерлерде де қараусыз малды басып кетіп жатқан жағдайлар орын алуда. Жылжымалы құрам шұғыл тежегіш қолданған және малды басып кеткен жағдайда Компания пойыздардың кідірісі, локомотивтердің малмен соқтығысуынан зақымдануы салдарынан миллиондаған теңге көлемінде шығын тартады. Сонымен қатар қожайындардың өздері шығынға батып отыр, бірақ соған қарамастан төрт түліктерін қараусыз жіберуден тыйылмай отыр.
Кейбір өңірлерде төрт түлікті таңбалау жұмыстары жүргізілуде, бұл өте дұрыс, мал иелерін бірден анықтауға мүмкіндік береді, бірақ бұл жұмыс кеңінен таралмай отыр. ҚР ӘҚБК-нің 559-бабына сәйкес, мал жаю ережелерін бұзу – ескерту жасауға немесе бес айлық есептік көрсеткіш мөлшерінде айыппұл салуға әкеп соғады. Теміржол көлігін пайдалану және қозғалыс қауіпсіздігі ережелерін бұзумен байланысты келген шығынды Компания мал иесінен сот тәртібімен өндіріп және жауапкершіліктен қашқан мал қожайындарын қылмыстық жауапкершілікке тарта алады. Сондықтан, малды таңбалауды жолға қойған жөн.