Климаттың өзгеруі – маңызды фактор

Халықаралық еңбек қорғау күніне орай Қызылорда теміржолында  аймақтағы қос бөлімшенің еңбек қорғау инженерлерінің ұйымдастыруымен  танымдық та, тағлымдық та әсері мол жиын өтті.

Алғашқы сөз кезегін алған Қызылорда қосалқы бөлімінің бас инженері Күлхан Белкібаев биылғы жылдың тақырыбы Климат өзгеруінің еңбек қауіпсіздігі мен гигиенасына әсерін қазіргі жағдайлармен байланыстыра отырып баяндама жасады, аймақтағы ауа-райына қатысты орын алу мүмкін жағдаяттардан мысал келтіріп, сақтануға шақырды.

– Климаттың өзгеруі сала еңбеккерлері жұмысында маңызды фактор саналатындықтан «ҚТЖ-ЖТ» серіктестігінің бас инженері М.Көкірекбаевтың факсограммасына сәйкес бүгінгі шара ұйымдастырылып отыр. Себебі кейбір салалық мекемелердің теміржолшылары тәулік бойы ашық аспан астында жұмыс жасайды. Ауа температурасының өзгеруі аймақта құрғақшылыққа, су тасқынына, жаздыгүні ыстық аптап желге, қыста қақаған аязға, өрт тұтану қаупіне, қоршаған ортаның түрлі деңгейде залалдану әсері теміржолшылардың денсаулығына қауіпті саналады. Біздер осындай қауіптің алдын алу үшін бекеттерде жылу жүйелерін көмірден газбен жылытуға көшірдік. Теміржолшылардың аптап ыстықта жұмыс жасамауы үшін ішкі бұйрық бойынша таңғы және кешкі салқында жұмыс кестесі жасалады. Яғни таңғы салқында жұмыс істеп, түскі аптап ыстықта жұмысшы қорғанып тынығуына жағдай жасалған, – деді бас инженер Күлхан Белкібаев.

Жиын барысында арнайы шақырылған «Medium clinic» серіктестігінің қызметкері Нұрлыбек Қалдыбек жазатайым оқиға орын алған жағдайда көрсетілетін алғашқы дәрігерлік көмек тәсілдерін көрсетті.  

Кездесу соңында еңбек қорғауда елеулі табысқа жеткен Қызылорда станциясының жүк қабылдап-тапсырушысы Бақтияр Асанов, парк кезекшілері Бектас Сергебаев, Ералы Жеңсікбаев, Белкөл станциясының операторлары Гүлмира Оңғарбаева мен Самат Асқаровқа алғыс айтылып, бағалы сыйлықтар табыс етілді. Ал магистральдық желі бөлімшесі басшылығының Алғыс хаты салалық мекемелерде еңбек қорғау талаптарын сақтауда жоғары нәтижеге қол жеткізген мекемелерге берілді.