Маңғыстауда еңбекті қорғау күніне орай байқау өтті

Маңғыстау магистральдық желі бөлімшесінде қызметкерлердің кәсіби біліктілігін көтеру және жұмыс орнында еңбек қауіпсіздігін сақтауды арттыру мақсатында жұмысшы мамандықтарының шеберлік байқауы өтті.

Дүниежүзілік еңбек қорғау күніне орай өткізілген байқауға бөлімшеге қарасты барлық мекемелердің қызметкерлері қатысты. Жұмысшылардың кәсіби шеберлігін сынға салған сайыс үш кезеңнен тұрды. Бірінші шартта қатысушылар нормативті-құқықтық сұрақтардан тест тапсырмаларын орындап, жиырма сұрақтан тұратын сынақтан өтті. Келесі турда әр қатысушыға үш ситуациялық сұрақ берілді. Оның ішінде алғашқы көмек көрсету, төтенше жағдайларда әрекет ету сияқты тапсырмалар бар. Соңғы шарт жұмысшылардың шапшаң және тез шешім қабылдап, ойын жинақтай алуы тексерілді. Ол үшін олар бір минут ішінде блиц сұрақтарға жауап беріп, ұпай жинады. Байқауға бөлімше директорының орынбасары Нұрболат Шалғабай мен бас инженер Тимур Разов қазылық етті.  

– Жұмысшы кәсіптерінің шеберлік байқауы қатысушыларға зор мотивация берді. Әрі олар өздерін сынап көріп, жұмысқа дағды алды. Сонымен қатар бұл сайыс жұмысшылардың шығармашылық белсенділігін дамытуға да мүмкіндік береді. Жұмыс орнында қауіпсіздікті сақтап, қатесіз еңбек етуге, еңбек жағдайын жақсартуға ынталандырады. Біздің байқаудан көздеген мақсатымыз да осы, – дейді бөлімшенің еңбек қорғау және экология секторының басшысы Тілектес Қондыбаева.

Байқау қорытындысы бойынша жеңімпаздар «Кәсібі бойынша үздік» номинацияларымен марапатталды. Бейнеу қалпына келтіру пойызының кран машинисінің көмекшісі Болатбек Байғабылов бірінші, Маңғыстау қалпына келтіру пойызының жұмысшысы Асхат Бимов екінші, Болашақ өрт сөндіру пойызының аға өрт сөндірушісі Абылай Жұмабаев үшінші орын алды. Шапағат Нұрымбетов пен Қожамұрат Төлесінов ынталандыру дипломына ие болды.