Тілсіз жаудан сақтануда тәжірибе маңызды

Теміржол қызметінде өрттен төнетін қауіп қай кезде болмасын жоғары. Сондықтан еңбек қауіпсіздігі бойынша тілсіз жаудан сақтану алдыңғы кезектегі мәселелер қатарында тұр.

Семей теміржолында бөлімше басшылығы мен салалық кәсіподақ ұйымының бастамасымен арнайы семинар-тренинг болып өтті. Негізгі тақырып – өрт қаупі туындаған жағдайдағы жедел әрекет және тілсіз жаудың алдын алу бойынша сақтық шараларын күшейту.  

Жиынға желі бойындағы барлық мекемелерден еңбекті қорғау инженерлері, өндірістік қауіпсіздік саласына жауапты мамандар жиналды. Семинар-тренинг барысында негізгі басымдық теміржол қызметіндегі стандартты емес жағдайлар кезіндегі қолданылатын дағды-машықты шыңдауға берілді. Яғни өрт қаупі туындаған шақтағы әрекет, шұғыл түрде апаттың алдын алу жұмыстарын үйлестіру мәселелеріне баса мән берілді. Өрт орын алған жағдайда адам және мүлік шығынына жол бермеу немесе тілсіз жаудан келер залалды мейлінше төмендету сөз болды. Бұл ретте ең бастысы тәжірибе, яғни әрбір қызметкердің қызыл жалынмен күрес жүргізуде тәжірибесі болуы тиіс. Яғни тосын жағдай туындаған шақта дүрбелеңге жол беріп, дағдарып қалмай жедел әрекет ете білулері қажет.  

Жиын барысында өрт сөндіру қызметінің мамандары атап өткендей, кеңседе жұмыс істейтін әрбір маман өрт сөндіру құрылғысымен жұмыс істей білуі керек. Осы орайда мемлекеттік емес өртке қарсы қызметтің инспекторы Е.Тойкенов қызыл жалын тұтана қалған шақта әр ғимаратта сақталатын өртсөндіргіш құрылғымен жұмыс істеудің оңай тәсілдерін тәжірибе жүзінде көрсетіп берді.  

Қатысушылар стандартты емес жұмыс жағдайында әрекет ету бойынша өзара пікір алмасты.