Ақау табу шебері
«Қазақстан теміржолшысы» газетінің тілшісі
Астана вагон пайдалану депосының Қырқыншы станциясындағы ТҚКҚ вагон қараушысы Асқар Қарабаев қауіпті ақауды анықтады.
Былтыр «Қозғалыс қауіпсіздігі үшін» төсбелгісіне ие болған ол жуырда тағы да қауіпті ақау тауып, «Адал еңбегі үшін» белгісіне ұсынылып отыр. Қарағандыдан келе жатқан жүк тиелген вагон сеператорынан түнде анықталған ақау осал емес еді.
– Бұрын да бүйір рамасының, ролик буксының сызаты, сепаратордың, тартым қамытының бұзылуы сынды бірнеше ақауды анықтағанмын. Ол кезде мұндай еңбектер елене бермейтін. Қазір компания тарапынан ақау тапқан вагон қараушыларды марапаттап көтермелеу, материалдық қолдау жолға қойылған. Бұл біздің одан әрі өнімді еңбек етуімізге септік етеді, – дейді теміржолшы.
Вагон шаруашылығы бойынша жоғары білім алған ол Астана вагон пайдалану депосына 2006 жылы жолдамамен келген. Содан бері табан аудармай еңбек етіп келеді. Басқарма төрағасының атынан компания құндылықтарына адалдығы, жоғары кәсіби шеберлігі, компанияға сіңірген еңбегі үшін Құрмет грамотасымен марапатталған.