Қазалыда өртке қарсы оқу-жаттығу өтті

Қазалы станциясындағы «ҚТЖ-ЖТ» серіктестігінің «Жанармай ресурстары орталығы» филиалында резервуардағы шартты өртті өшіру» өрт-тактикалық оқу-жаттығуы кезінде тілсіз жаудың жалыны бес минутта өшірілді.  

Өрттің шығуы жайлы сағат 11.00-де қағылған дабылдан кейін бұйрық бойынша  маневрлік тепловоз бекітіліп, Қазалы өрт сөндіру пойызының жеке құрамы орын алған жерге аттанды.11.12 сағатта оқиға орнына жетіп, тілсіз жауды ауыздықтауға кірісті.    

Жаттығу кезінде он төрт минутта өрт ошағы оқшауланып, бас-аяғы он тоғыз минутта, оқшауланғаннан кейін бес минут ішінде өрт ауыздықталып, жалыны толық өшірілген. Қазалы өрт сөндіру пойызының бастығы Бауыржан Төлепбергенов оқу-жаттығу кезінде әріптестерінің кәсіби деңгейге сай әрекет еткенін, тактикалық оқу теміржолшылардың кәсіби шеберлігін шыңдауға бағытталатынын жеткізді.    

– Қызылорда облыстық төтенше жағдайлар мекемесінің полковнигі А.Баякеевпен келісілген, Қызылорда магистральдық желі бөлімшесінің директоры Ербол Сәулебеков пен «КТЖ-ЖТ» ЖШС Қызылорда бөлімшесі филиалының директоры Батырхан Базарбаев бекіткен жоспарлы оқу-жаттығуына Қазалы өрт сөндіру пойызының жеке құрамы, техникалары және аудандағы өрт сөндіру мекемелерінен 62 адам жұмылдырылды. Сағат 11.00-де өрт оқиғасының шығуына байланысты дабыл соғылып, станциядағы теміржолшылар өрт жалынын өшіруге кірісіп, оқиға орнына өрт сөндіру пойызының баруы, айналаның бақылауға алынуы, оқшаулау, жалынды сөндіру оқиғаларының барлығы 11 сағат 45 минутта қорытындыланды, – деді Қазалы өрт сөндіру пойызының бастығы Бауыржан Райханұлы.

Тәуліктің кез келген сәтінде орын алуы мүмкін тосын жағдайда жеке құрамның әрекет етуін сараптау, кәсіби шеберлікті шыңдау, салалас мекемелердегі әріптестерімен тәжірибе алмасып, ынтымақтасып әрекет етуге дағдылануды көздеген жаттығу мақсаты орындалып, қатысушылар тапсырманы толық орындап шықты. Олардың арасында қазалылық өрт сөндірушілердің әрекетін ерекше атауға болады. Себебі жанар-жағармай сақталатын алып резервуардан байқалған қызыл жалынды ауыздықтау үшін қысымды көбікті нысанаға дәл бағыттап, қажет жерінде өрт ошағының ауданына қарай бағыт өзгерту, төгіліп жатқан көбіктің жалынды жауып өшіріп жатқанын бағамдай білу де кәсіби шеберлік пен тәжірибені қажет етеді. Төтенше жағдай орын ала қалған жағдайда сауатты әрекет етудің үлгісін  көрсеткен Қазалы өрт сөндіру пойызының жеке құрамындағы 17 адам, оның ішінде аға өрт сөндіруші Дастан Нұрғазиев, газ түтінінен қорғау қызметінің шеберлері Марат Жолтай, Қуандық Жеткербай, Сәкен Сарсенбеков, Есен Құсанов ерекше көзге түсті.    

Жылжымалы құрамдардың қозғалыс қауіпсіздігін сақтау барысында өрттің шығуы аса қауіпті саналады. Осындай қауіптің алдын алу үшін түрлі оқу-жаттығу шаралары маңызды. Қазалы станциясына ұйымдастырылған өрт сөндіру жаттығуы салалық құрамдардың тосын жағдайларға дайындығын пысықтау мақсатына жетіп көзделген нәтижеге қол жеткізді.