Техногендік сипаттағы төтенше жағдай қалай жойылды?

Мәртөк станциясында Ақтөбе жүк тасымалы мен Ақтөбе магистральдық желі бөлімшелері бас инженерлерінің қатысуымен өртке қарсы оқу-жаттығу өтті. Азаматтық және қорғаныс қызметі өкілдерінің қатысуымен өткен кешенді шара жоспардағыдай қорытындыланды.

«ҚТЖ» ҰК» АҚ-ның Ақтөбе магистральдық желі бөлімшесіне қарасты Ақтөбе өрт сөндіру пойызы Мәртөк станциясында өткен тактикалық оқу-жаттығуға қатысты. Шара Ақтөбе облыстық ТЖД және Мәртөк аудандық әкімдігімен бірлесе өтті.  

Шартты түрде Мәртөк ауданының тұсында жүк пойызының цистернасы жолдан шығып кетті. Цистернада күкірт қышқылы бар. Ақтөбе өрт сөндіру пойызына техногендік сипаттағы төтенше жағдайдың салдарын жою міндеті жүктелді. Күкірт тиелген цистернаның дәнекерлеген жерінен зақым келіп, 0,008 мм тесік пайда болды. Өрт сөндіру пойызының қызметкерлері арнайы қысқыш арқылы сыртқа атқылап жатқан күкірт қышқылының төгілуін тоқтатты. Жерге аққан күкірттің жан-жағын құм толтырылған қаптармен қоршап, ауаға тарамау үшін су бұршағы қолданылып, залалсыздандырылды.  

Туындаған қауіптің ауқымына қарай, оқиға орнында төтенше жағдайды жою бойынша жедел штаб құрылды. Апат орнына 16 адамнан тұратын жеке құрам жіберілді. Нәтижесінде күкірттің ауаға таралуын тоқтатып, қауіптің алды алынды.  

«Оқу-жаттығу болғанымен, шараны барынша шынайы жасауға тырыстық. Бұл – қызметкерлерді шыңдап, қауіп кезінде әрекеттерді есте сақтауына тиімді. Жаттығу кезінде ең алдымен жеке құрамның жедел және шапшаң, әр қимылды сауатты орындауы маңызды. Өрттің алдын алу бағытындағы жұмыстарды нығайту шарасы ойдағыдай өтті. Бұл апаттық жағдайда жұмыс істеуге жеңіл болады», – деді Ақтөбе өрт сөндіру пойызының бастығы Бауыржан Файзулла.  

Оқу жаттығу кезінде өрт сөндіру пойызының бөлімше бастығы А.Нығметов, газдан-түтіннен қорғау шеберлері К.Мұстафин мен Т.Сағиевтің шеберліктері ерекше аталды. Аса мұқияттылық танытып, күкірт тиеген цистерна тетігін бекітіп, ағып жатқан улы затпен жұмыс жасау шеберліктерін көрсете алды. Нәтижесінде уланып қалған тұрғын дер кезінде оқиға орнынан шығарылып, алғашқы медициналық көмек көрсетілді. Улы зат елдімекенге тараған жоқ. Тұрғындар зардар шекпеді. Жерге төгілген күкірт үсті толықтай көбікпен жабылды. Техногендік сипаттағы төтенше жағдайды жою талапқа сай жүзеге асырылды.