Өндірісте еңбек қауіпсіздігін сақтау маңызды
"Қазақстан теміржолшысы" газетінің Жамбыл облысындағы меншікті тілшісі
Шу теміржол торабында еңбек қауіпсіздігін сақтау және алдын алу мәселелерін қамтыған кезекті жиын өтті. Басқосуға «ҚТЖ-Жүк тасымалы» ЖШС «Жамбыл ЖТ бөлімшесі» филиалының бас инженері Дүйсенбек Сыдықов пен Жамбыл магистральдық желі бөлімшесі директорының орынбасары Дәулетбек Жолдасбаев қатысты.
Жиында бірқатар мекеме басшыларының күн тәртібіндегі тақырып бойынша жасаған талдаулары тыңдалды. Алдын ала жүргізілген талдау-сараптау жұмыстары кезінде мекемелерде бірқатар кемшіліктер анықталған.
Өндірісте еңбек қауіпсіздігі талаптарын сақтамау – қауіп-қатердің туындау ықтималдығын арттыратыны белгілі. Кей жағдайларда мамандар нұсқамаларды естен шығарып алып жатады. Қарапайым ескертулерді орындамаудың салдары үлкен өкінішке ұрындыруы мүмкін.
Жиын соңында Шу локомотив пайдалану депосының 4 қызметкеріне сый-құрмет көрсетіп, зейнетке шығарып салды. Олар – ұзақ жылдар осы депода қарапайым жұмысшыдан бастап, электровоз машинисі, слесарь болып еңбек етіп, теміржолды дамытуға елеулі үлес қосқан тәжірибелі мамандар.
Шу локомотив пайдалану депосының электровоз машинистері Бақытжан Ноғайбеков пен Самат Байтүлеков қырық жылға жуық еңбек етіп, талай шәкірт тәрбиелеген майталмандар. Ал Жетпісбай Мырзабаев пен Анатолий Кочетов локомотивтерді тексеру жөніндегі слесарь болып жұмыс істеді. Алғашқысының теміржолдағы еңбек тәжірибесіне – биыл 41 жыл толса, Анатолий Григорьевичке 40 жыл.
Сала басшылары білікті мамандарға алғыстарын жеткізіп, лайықты сый-құрметпен шығарып салды.