Жанып келе жатқан жолаушылар пойызы сөндірілді

Ақтөбе станциясында жолаушылар пойызындағы өрт сөндірілді. Иіс тиген жолаушыға көмек көрсетілді. Осылайша, теміржолшылар өртке қарсы оқу-жаттығуды сценарий бойынша мүлтіксіз орындап шықты.  

Ақтөбе магистральдық желі бөлімшесіне қарасты Nº39 өрт сөндіру пойызы станцияда оқу-жаттығу шарасын өткізді. Оған жол дистанциясы, ТЖД қызметкерлері қатысты. Сценарий бойынша жүріп келе жатқан жолаушылар пойызында тіркелген өртті сөндіру керек.

«Жанып келген жолаушылар пойызын сөндіру бойынша жұмыс жүргізіліп, шынайы оқиға болған жағдайда әрекет ету тәжірибесі пысықталды. Оқиға кезінде міндеттерді бөлу тиянақталды», – деді қарауыл бөлімшесінің бастығы Жаңбырбай Әбдіғазиев.  

Қарауыл бастығының айтуынша, алдын алу жұмыстары тұрақты өтеді. Бұл өте қажет әрі маңызды. Сценарий бойынша жанып жатқан вагон ішінде бір жолаушы иіс тиіп, зардап шекті. Өрт сөндірушілер мен ТЖД қызметкерлері алдымен  жолаушыны шығарып, алғашқы медициналық көмек көрсетті, кейін медициналық қызметкерлер қолына тапсырды. Әрі қарай өрт сөндіру пойызы іске қосылды. Көбік беру  арқылы өрт сөндіріліп,  су шашып, вагонды салқындату жұмысы жасалды.  

Биыл жаз ыстық болуына байланысты өрт қаупі де жоғары. Сондықтан  өрт сөндірушілер де сақадай сай отыр. Ақтөбе аймағында 5 өрт сөндіру пойызы бар. Олардың әрқайсысында 16-17 өрт сөндірушіден бар. Сонымен қатар Тассай станциясында бір өрт сөндіру бекеті жұмыс істеп тұр.