Тұрғындарға темір жол бойында мал жаюдың тәртібі түсіндірілді
Маңғыстау облысы бойынша меншікті тілші
Төрт түліктің темір жолға шығып кетіп, пойыздың астына түсуі – қай жағынан да қып-қызыл шығын. Шаруалар күнкөріс көзіне жаратар малынан айрылса, теміржол одан да көп шығынға ұшырап, арты қауіпті апатқа ұласуы да мүмкін.
Маңғыстау станциясындағы желілік полиция бөлімі мен теміржолшылардың жол бойындағы кезекті рейдінің мақсаты – жергілікті халыққа қауіпсіздік шараларын түсіндіріп, шығынмен қатар әкімшілік және материалдық жауапкершілікті ескерту болды.
Жергілікті желілік полиция бөлімінің инспекторлары теміржолшылармен бірлесіп теміржолға жақын орналасқан ауылдарды аралауға шықты. Мал ұстайтын шаруашылықтар мен жекеменшік иелерімен кездесіп, теміржол көлігінде қозғалыс қауіпсіздігінің сақталуы үшін қауіпсіздік ережелерін бұзбау, белгіленбеген жерлерден темір жол арқылы өтпеу жайын, темір жол бойында мал жаюдың тәртібі туралы кең көлемде түсінік жүргізді.
Кезекті халықпен кездесу Маңғыстау ауданына қарасты Шетпе елдімекенінде жалғасты. Халық тығыз орналасқандықтан жергілікті халық төрт түлікті көп ұстайды. Сондықтан қауіп-қатер де көп. Тұрғындарды жинап, әкімшілік өкілдерін қатыстырған жиындар өтіп, ауыл жұрты малын бақташымен бағып, қайда жүргенін қадағалау жайы сөз болды.
– Маңғыстау ЖПБ қызмет көрсету аумағында біз – Маңғыстау Магистральдық желі бөлімшесі жол бөлімінің инженері Е.Аманжолов, Маңғыстау жол дистанциясы техникалық бөлімнің жетекші жол инженері Е.Артықбаев, Маңғыстау жол дистанциясы бас инженері М.Көктеубаев, Маңғыстау жол дистанциясы 2-өндірістік телім жол шебері Д.Зейлов шетпеліктерге профилактикалық түсіндірме жұмыстарын жүргізуге арнайы бардық. Жұмыстарымыз оң нәтиже беріп, алдағы уақытта бірқатар кемшіліктердің жойылуына ықпал ететін жұмыстар қолға алынатын болады деп ойлаймыз. Кейде қарапайым кедергілердің салдарынан пойызға басылған малдың иесін анықтау қиынға соғып, іс ашылмай қалып жатады, сондықтан шетпеліктерге төрт түлігін сырғалауды ұсындық, – дейді Маңғыстау ЖПБ инспекторы А.Шақпақов.
Белгілі болғандай, аталған бөлімше аумағында жыл басынан бері жеті айда малдың жолға шығуынан отыздан астам шұғыл тежеу тіркеліпті. 15 адамға теміржол бойында мал жаю қағидаларын бұзғаны үшін әкімшілік хаттама толтырылған.